Vísir greindi frá því í gær að Keflavíkurflugvelli hafi borist sprengjuhótun. Sagði Ómar Mehmet Annisius, aðstoðaryfirlögregluþjónn á Suðurnesjum að hótunin hafi verið metin ótrúverðug af lögreglunni á Suðurnesjum sem og greiningardeild ríkislögreglustjóra. Greint var frá því um miðbik október að Íslandsbanka hefði einnig borist sprengjuhótun.
Mbl.is greinir frá því að leikskólum hafi einnig borist sprengjuhótanir en Ásmundur Rúnar Gylfason aðstoðaryfirlögregluþjónn staðfestir þetta í samtali við Vísi. Hann segir hótanirnar til rannsóknar og tekur fram að þær hafi allar verið metnar ótrúverðugar eftir skoðun.
„Þetta eru bæði stofnanir hjá hinu opinbera og eins líka einkafyrirtæki sem hafa nokkur fengið hótanir. Hingað til hafa þessar hótanir verið metnar ótrúverðugar en við tökum þetta engu að síður alvarlega.“
Hvaða fyrirtæki eru þetta sem um ræðir, er þetta handahófskennt?
„Ég átta mig nú ekki á því hvernig viðkomandi velur þetta. En við erum ekki að tala um smáfyrirtæki.“
