Kannast ekki við nýtt sam­komu­lag við Trump - Vísir

Dmitrí Peskóv, talsmaður Pútíns, sagði við blaðamenn í morgun að Kreml hefði ekki borist neinar upplýsingar um hvað Trump og Dmitriev töluðu um. Hann sagði að Dmitriev væri ekki snúinn aftur til Rússlands og því hefðu yfirvöld ekki upplýsingar um hvað þeir hefðu talað um.

Trump vildi ekki segja í gær hvað hann og Dmitriev hefðu talað um. Þeir funduðu eftir viðburð í Hvíta húsinu þar sem Melanía Trump tók á móti erindrekum frá Rússlandi og Úkraínu til að fagna yfirstöðnu vopnahléi í Olesky í Úkraínu.

Bærinn hefur um nokkurt skeið verið í höndum Rússa og hafa borist þaðan fregnir af hræðilegum aðbúnaði íbúa og harðræði sem þeir eru beittir af Rússum.

Rússneskur herbloggari sem var í Oleshky og birti myndir og myndbönd þaðan hefur verið handtekinn og er sagður sakaður um landráð, samkvæmt öðrum herbloggurum. Hann birti færslu um brottflutning fólks frá bænum sem varpaði ljósi á að langfelstir íbúa vildu ekki fara til Rússlands.

Þá segja Úkraínumenn að Rússar hafi notað vopnahléið til að flytja sveitir sínar framar á víglunni nærri Oleshky.

Eftir viðburðinn í Hvíta húsinu í gær fundaði Trump með Dmitriev en hitti ekki úkraínsku sendiherrana.

Þá sagði Trump að „stórt og fallegt“ samkomulag við Rússa væri í vændum. Hann sagði að samkomulagið myndi ekki eingöngu snúast um Úkraínu heldur „gervalla Evrópu“ og að allir yrðu hæstánægðir með það.

Vilja skapa öryggi til framtíðar 

Jared Kushner, tengdasonur Trumps og sérstakur erindreki hans, birti í nótt langa færslu sem fjallaði um viðræður um innrás Rússa í Úkraínu. Sú færsla gefur til kynna að verið sé að vinna að einhvers konar samkomulagi um framtíðarskipulagningu öryggismála í Evrópu.

Þar sagði Kushner að í þessari viku hefði hann rætt við bandamenn Bandaríkjanna í Evrópu og Úkraínumenn. Markmiðið væri að mynda raunhæft fyrirkomulag sem kæmi til móts við áhyggjur allra hliða og drægi úr hættunni á átökum í framtíðinni.

„Í meira en þrjátíu ár hafa Evrópa og Rússland átt í basli með að mynda sjálfbært öryggisskipulag. Áratugir af vantrausti, andstæðum öryggissjónarmiðum og hræðilegum afleiðingum þessa stríðs gera þetta mjög erfiða áskorun en hún er nauðsynleg fyrir varanlegan frið.“

Kushner nefndi fimm markmið sem væru til skoðunar.

Eitt þeirra markmiða snýr samkvæmt Kushner að varanlegu samráði um öryggismál. Annað markmiðið snýst um traust samskipti á krísutímum. Það þriðja um aukið gagnsæi í málefnum hernaðar. Það fjórða um gagnkvæmar aðgerðir til að sporna gegn stigmögnun. Fimmta markmiðið snýr svo að því að mynda varanlegan grunn að samstöðu um langtímafrið og öryggi í Evrópu.

„Hvers konar samkomulag verður að virða fullveldi ríkja, landamæri þeirra og sjálfstæða ákvarðanatöku. Hvert ríki mun ráða eigin öryggismálum og bandalögum og ekkert ríki mun hafa neitunarvald yfir fullvalda ákvörðunum annars. NATO verður áfram hornsteinn sameiginlegra varna Evrópu og framtak þetta myndi byggja á núverandi stofnunum og skuldbindingum.“

Erindrekar frá Rússlandi, Úkraínu og Bandaríkjunum munu funda í Sameinuðu arabísku furstadæmunum í næstu viku en það verður fyrsti fundurinn af þessu tagi.

Kushner segir að ef þau fundarhöld muni skila árangri muni ráðamenn í Evrópu koma að næstu viðræðulotu.

„Þetta er erfið nákvæmnisvinna,“ skrifaði Kushner.

„Það eru engar auðveldar lausnir. En tækifærið til að binda enda á þetta hræðilega stríð og skapa grunn fyrir friðsamari, öruggari og farsælli Evrópu til langs tíma gerir þessa áskorun þess virði.“

Kröfur Rússa þær sömu

Kröfur Rússa fyrir innrásina í Úkraínu, sem virðast enn vera kröfur þeirra, sneru að því að ríkjum Austur-Evrópu yrði vísað úr NATO. Þá krefjast þeir einnig þess að fá landsvæði í austurhluta Úkraínu sem þeir hafa ekki getað tekið með hervaldi og að setja ýmsar takmarkanir á herafla Úkraínu til framtíðar.

Úkraínumenn hafa áhyggjur af því að þessar kröfur myndu gera Úkraínu mun berskjaldaðri fyrir nýrri innrás seinna meir.

Sjá einnig: Með sömu óásættanlegu kröfurnar

Rússar hafa formlega innlimað stærri hluta Úkraínu en þeir stjórna nú þegar. Mesta áherslu leggja þeir nú á að hernema restina af Donbas-svæðinu svokallaða, sem myndað er af Lúhansk og Dónetskhéruðum.

Rússar stjórna mestöllu Lúhansk og stærstum hluta Dónetsk en ekki svæði sem Úkraínumenn kalla „virkisbeltið“.

Það svæði er um fimmtungur Dónetsk, og inniheldur nokkrar mjög víggirtar borgir.

Rússum hefur ítrekað reynst erfitt að taka úkraínskar borgir án gífurlegrar fyrirhafnar og mikils mannfalls og binda Úkraínumenn vonir við að geta stöðvað Rússa á þessu virkisbelti.

Helstu borgirnar í virkisbeltinu eru Kostíantínívka, Kramatorsk og Slóvíansk.

Í síðasta mánuði hélt Pútín ávarp þar sem hann sakaði Vesturlönd um að bera ábyrgð á innrás hans í Úkraínu. Hann varði einnig tíma í að syrgja fall Sovétríkjanna og talaði um að NATO væri búið að hreiðra um sig á „sögulegum svæðum“ Rússa.

Sjá einnig: Syrgði Sovét­ríkin og hótaði notkun kjarn­orku­vopna

Ef Úkraínumenn myndu gefa eftir Donbas-svæðið og virkisbeltið yrðu varnir þeirra gegn mögulegri annarri innrás Rússa seinna meir, veikari en ekki. Þar að auki er lítið sem bendir til þess að Rússar hafi yfir höfuð burði til að hernema svæðið, miðað við gang hersveita þeirra undanfarna mánuði og jafnvel ár.

Úkraínumenn standa enn frammi fyrir þeim sama vanda að þurfa einhvers konar öryggistryggingar eigi þeir að semja um frið við Rússa. Það er að segja, einhverjar tryggingar fyrir því að Rússar ákveði ekki aftur að gera innrás.