Hún lýsti því hvernig henni fannst hún knúin til þess að hafa sjálf samband við Írisi Helgu. Það hafi verið of erfitt að horfa upp á systurdóttur sína ganga í gegnum þessa upplifun.
Sendi sjálf á Írisi
„Ég var búin að sjá hvernig skilaboð móðir hennar, faðir hennar og bræður hennar voru að fá og grunurinn var að þetta væri Íris sjálf, svo að ég ákvað að senda á hana,“ sagði vitnið en hún er móðursystir sambýliskonu brotaþola.
„Ég var að biðja hana um að hætta að hrella frænku mína og biðja hana um að láta hana í friði,“ sagði vitnið í dag á fjórða degi aðalmeðferðar en einnig báru vitni starfsmenn barnaverndarnefndar auk geðlæknis og sálfræðings sem báru vitni fyrir luktum dyrum.
Sjá einnig: Sögðu Írisi hafa beðið sig um að lemja brotaþola
Vitnið sagðist hafa stutt við bakið á frænku sinni og brotaþola eftir fremsta megni en hún sendi Írisi skilaboðin í gegnum Messenger og á aðalaðgang Írisar, ekki einn þeirra sem hún er sökuð um að hafa sent skilaboð úr.
„Svo fór ég að fá allavega skilaboð, en frá hinum ýmsu aðgöngum. Ekki falleg ummæli,“ sagði vitnið þá. Henni hafi liðið mjög illa að fá slík skilaboð.
„Upplifa frelsissviptingu og sorg“
Meðal annars hafi Íris átt að hafa birt færslu um vitnið inn á Facebook-stuðningshópinn Gleym mér ei en hann er ætlaður foreldrum sem hafa misst barn á meðgöngu, sem hafa þurft að fæða börnin sín andvana eða vitandi að þau eiga ekki lífsvon eða börnin hafa látist stuttu eftir fæðingu.
„Ég lendi í því að Íris setur inn á Gleym mér ei-síðuna mjög ljótt um mig, að ég hafi sagt að hún hafi drepið barnið sitt, sem er ekki satt og ég gerði það ekki,“ sagði vitnið en hún segir færsluna hafa verið tekna út skömmu eftir að hún var sett inn.
Það séu ekki til nægilega mörg lýsingarorð til að lýsa því hvernig brotaþoli og frænka vitnisins hafi það.
„Við erum að tala um svo mikinn ótta, þau eru að upplifa frelsissviptingu og sorg,“ sagði hún og minntist á það að þau upplifi sem að þau muni aldrei geta um frjálst höfuð strokið „eftir það sem gerðist á miðvikudaginn“.
Elti parið heim til sín
Má þar ætla að hún hafi verið að vitna í atvik sem Heimildin greindi frá þar sem Íris ásamt fjölskyldu sinni gerði aðsúg að brotaþola og sambýliskonu hans eftir að þau voru komin heim til sín að réttarhöldum loknum á miðvikudag.
Parið hafi setið um stund í bíl sínum en þá hafi Íris Helga lagt sínum bíl fyrir aftan þau. Því næst hafi annar bíll keyrt inn í götuna en móðir og dóttir Írisar hafi stigið þar úr. Þær þrjár hafi allar byrjað að taka parið upp með símum sínum en því næst hafi stjúpfaðir Írisar stigið út úr þriðja bílnum.
Hefur Heimildin þetta eftir heimildum en stjúpfaðirinn á að hafa lamið í framrúðu bíls parsins og krafist þess að ræða við þau, sem þau neituðu.
Írisi Helgu var í kjölfarið birt nálgunarbann sem gildir í tólf mánuði en í umfjöllun Heimildarinnar segir að gagnið hafi verið lagt fram fyrir dómara í morgun áður en réttarhöld héldu áfram. Athygli vakti að parið var ekki viðstatt réttarhöldin í morgun en þau hafa setið allt réttarhaldið og báru vitni í málinu á þriðjudag.
Sonur brotaþola var sá fyrsti sem bar vitni í dag en hann var bersýnilega í uppnámi þegar hann lýsti áhrifunum sem umsáturseineltið hafði á föður sinn.
