Úkraínu­menn og Rússar funda í Abu Dhabi - Vísir

Frá Bandaríkjunum eru þeir Jared Kushner, tengdasonur Donalds Trump Bandaríkjaforseta, og Steve Witkoff, vinur og viðskiptafélagi forsetans, en þeir eru sérstakir erindrekar Trumps og hafa það markmið að reyna að koma á friði. Þeir eiga að miðla milli Rússa og Úkraínumanna á fundinum.

Til stendur að fundarhöldin standi yfir í tvo daga.

Lögðu línurnar fyrir fund

Witkoff sendi í morgun út yfirlýsingu þar sem hann sagði að fyrir fundinn með Rússum hefðu hann og Kushner, úkraínska sendinefndin og evrópskir erindrekar fundað og stillt saman strengi sína.

Hann sagði að áhersla yrði lögð á að hvers konar friðarsamkomulag þyrfti að virða fullveldi, landmæri og sjálfstæða ákvarðanatöku Úkraínumanna. Það þyrfti einnig að innihalda trúverðugar og öruggar öryggisráðstafanir handa Úkraínumönnum, þ.e.a.s. einhverjar ráðstafanir sem eiga að koma í veg fyrir að Rússar geri aðra innrás í landið seinna meir.

„Hið sameiginlega markmið er að þróa raunhæfan og sterkan öryggisramma sem eykur öryggi Úkraínu til langs tíma og byggir upp það traust sem þarf til að hægt sé að semja um frið.“

Witkoff segir viðræðurnar fyrir fundinn með Rússum hafa snúist um hvernig hægt væri að byggja á stofnunum og samkomulögum sem eru þegar til til að tryggja öryggi í Evrópu að stríðinu loknu. Allir hefðu verið sammála um að slíkt væri gífurlega mikilvægt.

Þá ítrekaði hann að sterkt Atlantshafsbandalag yrði áfram grunnstoðin í sameiginlegum vörnum yfir Atlantshafið.

Ræddu NATO-líkar tryggingar fyrir Úkraínu

Politico sagði frá því í gærkvöldi að bandarískir erindrekar hefðu lagt til við Rússa að Úkraína fengi ekki aðild að NATO en þess í stað yrði gerður samningur við ríkið sem veitti Úkraínu NATO-líkar öryggisráðstafanir.

Slíkt ætti þá að fela í sér að ríki NATO kæmu Úkraínu til aðstoðar í takt við ákvæði stofnsamnings bandalagsins um sameiginlegar varnir, ef Rússar gerðu aðra innrás.

Bandaríkjamenn eru sagðir hafa spurt rússneska ráðamenn hvort þeir yrðu sáttir við slíkt fyrirkomulag.

Ef marka má fyrri yfirlýsingar Vladimírs Pútín og annarra ráðamanna í Rússlandi er mjög ólíklegt að Rússar myndu sætta sig við fyrirkomulag sem þetta.

Sjá einnig: Kannast ekki við nýtt sam­komu­lag við Trump

Kröfur Rússa fyrir innrásina í Úkraínu, sem virðast enn vera kröfur þeirra, sneru að því að ríkjum Austur-Evrópu yrði vísað úr NATO. Þá krefjast þeir einnig þess að fá landsvæði í austurhluta Úkraínu sem þeir hafa ekki getað tekið með hervaldi og að setja ýmsar takmarkanir á herafla Úkraínu til framtíðar.

Það eru kröfur sem Úkraínumenn hafa hingað til hafnað og þá meðal annars vegna þess að þær myndu gera Úkraínu mun berskjaldaðri fyrir nýrri innrás seinna meir.

Helsta markmiðið að koma á friði

Úkraínska sendinefndin er leidd af Rustem Úmeróv, yfirmanni einnar af leyniþjónustum Úkraínu. Með honum eru fleiri menn eins og Kyryló Búdanóv, sem er starfsmannastjóri Vólódímírs Selenskí, forseta, og var yfirmaður leyniþjónustu úkraínska hersins.

Fyrir fundarhöldin í dag sendi Úmeróv út yfirlýsingu þar sem hann fór yfir hvað myndi gerast í dag og sagði að helsta markmið Úkraínumanna væri að binda enda á átökin, tryggja áframhaldandi öryggi Úkraínu og ræða uppbyggingu að stríðinu loknu og mannúðaraðstoð.