Greint var frá því í Morgunblaðinu í gær að Brynja Baldursdóttir, stjórnarformaður Landsvirkjunar, hefði neitað að afhenda blaðinu tölvupóstsamskipti sín við Hörð þegar hann var forstjóri Landsvirkjunar. Daði Már hafði áður látið hafa eftir sér við Morgunblaðið að það myndi hafa afleiðingar ef Brynja hefði gefið Herði rangar upplýsingar um ástæður frestunarinnar.
Fréttastofa ræddi við Daða Má Kristófersson að loknum ríkisstjórnarfundi í morgun.
Daði segir það vera í höndum Landsvirkjunar að ákveða hvort stjórnskipunar- og eftirlitsnefnd fái fundargerðir og gögn um innri samskipti fyrirtækisins.
Hann sagði á Alþingi í gær að öll gögn ráðuneytisins um málið yrðu lögð fram og sagðist ætla að bíða niðurstöðu stjórnskipunar- og eftirlitsnefndar áður en hann tæki ákvörðun um hvort grípa þurfi til aðgerða.
Segir dagskrána hafa ráðið frestuninni
Áður hefur verið greint frá því að stjórn Landsvirkjunar hefði óskað eftir fundi með Daða Má að undirlagi Harðar til að ræða samskipti fyrirtækisins við fjármálaráðuneytið. Fundurinn hafi verið bókaður 7. janúar.
Hörður sagði í bréfi til Daða að Brynja hefði tjáð honum að ráðherrann vildi breyta fundinum og hitta stjórnina án Harðar. Brynja sagði í svari við skriflegri fyrirspurn mbl.is að ráðuneytið hefði lagt til að fresta fundinum og halda upplýsingafund með stjórninni fyrst.
Daði segir í samtali við fréttastofu að um hafi verið að ræða tvo aðskilda fundi. Annars vegar fund með stjórninni 6. janúar sem hafi verið árlegur upplýsingafundur. „Svo var það bara dagskráin sem gerði það að verkum að hinum var frestað,“ segir Daði sem kveðst tilbúinn að funda með Herði hvenær sem er.
Segir spurningarnar hafa verið til upplýsinga
Daði Már sagði á Alþingi í síðustu viku að rekstrarmál Landsvirkjunar hefðu ekki verið rædd á fundinum með stjórninni. Hann greindi frá því á Alþingi í gær að hann hefði spurt stjórn um lokagreiðslu vegna kaupa ríkisins á hlut Landsvirkjunar í Landsneti og um samskipti fyrirtækjanna tveggja. Í samtali við fréttastofu segir Daði að spurningarnar hafi ekki verið efni fundarins. Hann hafi verið að afla upplýsinga hjá stjórninni.
Stjórnin færði til bókar í fundargerð 6. janúar að Daða þótti óheppilegt að ágreiningur Landsvirkjunar og Landsnets rataði í fjölmiðla.
„Ég var einfaldlega að koma þessu sjónarmiði til skila,“ svaraði Daði spurður út í þessa bókun.
