Ívar Þórður Ívarsson, verslunarstjóri JYSK á Smáratorgi, segir að fólk sé farið að skreyta fyrr og sækist jafnframt eftir meiri ljósadýrð. Sjálfur gefur hann tóninn í sínu hverfi áður en október er liðinn.
„Við erum með mikið úrval útiljósa í ólíkum stærðum og gerðum og einnig fjölbreytt úrval jólaljósa til að hafa inni, svo sem ljósakransa og ljósahringi í gluggana,“ segir Ívar.
Lítil ljós sem breyta stemningunni
Jólaljósin eru löngu orðin meira en hefðbundnar seríur á jólatréð. Ljósaskrautið getur staðið eitt og sér á borði, lýst upp glugga eða fengið sinn stað á hillu. Ívar nefnir meðal annars litlar styttur, stjörnur og tré með ljósum, auk nettra rafhlöðusería sem gefa fjölbreytta möguleika við skreytingar.
„Við erum með mikið úrval af skrauti sem gengur fyrir rafhlöðum og hægt er að hafa inni til að lýsa upp skammdegið.“
Lítil jólatré í potti með ljósum hafa verið sérstaklega vinsæl síðustu ár. Þau þurfa ekki mikið pláss og henta vel þar sem fólk vill skapa jólalegan svip án þess að setja upp stórt tré.
„Það er hægt að stilla þeim upp í stofuhorni og þau eru þægileg og fín. Svo erum við með borðskraut og alls konar greinar sem hægt er að skreyta með ljósum og leggja eftir endilöngu borðstofuborðinu.“
Úrval gluggaskrauts hefur einnig aukist. Hringir og stjörnur fengu góðar viðtökur í fyrra og því var ákveðið að bjóða meira af slíku fyrir þessi jól.
Mörg ljós á stuttri snúru
Meðal vinsælustu ljósaseríanna hjá JYSK eru svokallaðar Cluster-seríur. Einkenni þeirra er að ljósin sitja þétt á snúrunni og gefa því mikla birtu á tiltölulega stuttum kafla. Þær geta til dæmis farið vel á skyggni eða meðfram handriði. „Cluster-seríurnar seljast langmest enda fær fólk þar mörg ljós á stuttri snúru,“ segir Ívar.
Hlýhvít birta er enn vinsælasta valið, en marglitu ljósin eiga líka sinn aðdáendahóp. Nú hefur úrval marglitra Cluster-sería verið aukið til að mæta eftirspurn. „Þessar klassísku hvítu eru vinsælastar og við seljum mest af þeim. Þetta er hlýr hvítur litur, þannig að birtan er falleg og ekki alveg skjannahvít.“
Fyrir þá sem vilja meiri ljósadýrð nefnir hann einnig seríu með 1.152 ljósum. Slík lýsing fer varla fram hjá fólki sem á leið um hverfið. „Það er gríðarlegt magn af ljósum og húsið lýsist vel upp. Nágrannarnir sjá það alveg.“
Ljósanet yfir runna og grýlukerti undir þakbrún
Úrvalið nær frá stuttum seríum með fáum ljósum yfir í langar seríur fyrir stærri verkefni. Ljósanet eru þægilegur kostur þegar skreyta á runna, enda dreifast ljósin yfir flötinn þegar netið er lagt yfir. „Þau hafa verið mjög vinsæl. Þú getur lagt netið yfir runnann og þá er allt klárt.“
Grýlukertaseríur verða sömuleiðis sífellt vinsælli, að sögn Ívars. Þær hanga niður frá festingum og gefa húsinu jólalegan svip. Grenilengjur eru líka mikið notaðar utan um handrið og niðurfallsrör, festar með ströppum og skreyttar ljósum.
Vönduð uppsetning skiptir máli
Ívar leggur áherslu á að fólk gefi sér tíma til að setja jólaljósin upp utandyra. Velja þurfi ljós sem ætluð eru til notkunar utandyra og huga að því hvernig snúrurnar liggja, sérstaklega þar sem greinar hreyfast í vindi.
„Þegar þú setur seríu í tré máttu ekki bara henda henni yfir það. Um leið og greinarnar fara að slást til geta þær slitið seríuna.“
Hann ráðleggur fólki að vefja seríunni um greinarnar, leiða hana inn að stofni og þaðan yfir á næstu grein. Þannig dragi úr togi þegar tréð hreyfist. Einnig þurfi að gæta þess að serían liggi ekki í vatni sem geti frosið utan um snúruna. „Við Íslendingar skreytum mikið og þurfum að vanda uppsetninguna. Ef eitthvað kemur upp á er minnsta mál að hafa samband við okkur.“
Þótt margar seríur henti bæði úti og inni er rétt að skoða merkingar hverrar vöru áður en henni er valinn staður. Starfsfólk JYSK aðstoðar við valið og Ívar segir markmiðið vera að leiðbeina fólki um hvað henti best hverju sinni.
Fyrstur í hverfinu
Hægt er að skoða úrvalið á vef JYSK og Ívar hvetur fólk einnig til að koma í verslanirnar, þar sem ljósum hefur víða verið stillt upp.
Sjálfur byrjar hann að skreyta vikuna fyrir hrekkjavöku. Hann þekkir vel áhrifin sem fyrstu ljósin geta haft. „Þá byrja ég að setja upp því ég veit að þegar ég geri það fara nágrannarnir líka í gang.“
Kannski þarf ekki meira en hlýja birtu frá næsta húsi til að hefja jólaundirbúninginn.
