Á Nýbýlaveginum í Kópavogi er matvöruverslunin Fiska þar sem yfirleitt er örtröð síðdegis og um helgar. Verslunin selur ýmsa matvöru frá öllum heimshornum sem oft er ekki til í öðrum búðum.
Tekjuaukningin hjá Fisku hefur verið ævintýraleg síðustu ár og hefur verslunin nú sprengt af sér húsnæðið í Kópavogi og er verið að tvöfalda það segir eigandinn Árni Elvar Eyjólfsson. „Þetta hefur verið svaka verkefni hjá okkur feðgum: Að geta haldið í við svona mikla aukningu á stuttum tíma. [...] Við sprengjum allt utan af okkur. Við erum búin að sjá það síðustu mánuði að við getum haft miklu, miklu meira úrval en við höfum í dag,“ segir Árni Elvar þegar hann ræðir um framkvæmdirnar við stækkun verslunarinnar á Nýbýlaveginum.
Tekjur fara í rúma tvo milljarða
Árni Elvar segir að veltan hafi sexfaldast frá árinu 2020 þegar Fiska opnaði á Nýbýlaveginum í miðjum Covid-faraldrinum.
Árni Elvar segir að í fyrra hafi tekjur Fisku numið rúmlega 1650 milljónum króna og aukist um 25 prósent á milli ára. Hagnaðurinn var 130 milljónir króna. Hann segir að tekjurnar í ár muni nema meira en tveimur milljörðum.
Fiska er ein af nokkrum verslunum sem hafa sprottið upp á höfuðborgarsvæðinu á liðnum árum sem sérhæfa sig í að selja matvöru sem ekki er til í flestum stórmörkuðum nema að litlu leyti. Þar er að finna þurrkuð og fersk krydd frá Asíu, Afríku og Suður-Ameríku; fisktegundir sem hvergi annars staðar eru til og núorðið ferska kjötvöru frá bæði Íslandi og öðrum löndum. Sem dæmi um aðrar slíkar búðir eru Istanbul Market á Grensásvegi og Dai Phat Asian Supermarket í Faxafeni.
Fjallað er um Fisku í fréttaskýringaþættinum Þetta helst. Þáttinn má hlusta á hér:
Byrjaði í Kolaportinu með fisk frá Grundarfirði
Saga Árna Elvars sem kaupmanns nær aftur til ársins 1994 þegar hann byrjaði að selja fisk í Kolaportinu þegar hann var sautján ára menntaskólanemi. Fiskurinn sem hann seldi þar kom frá vinnslu ömmu hans og afa í Grundarfirði. „Ég byrjaði í september árið 1994 þegar ég var að selja fisk í Kolaportinu frá fiskverkun sem amma og afi voru með. Ég er að selja þarna öll árin sem ég var í Verslunarskólanum, þar til ég útskrifast 98. Ég ákveð að taka mér eins árs frí frá námi og ákveð að fara vestur og opna þar matvöruverslun,“ segir Árni Elvar sem rak verslunina í Grundarfirði í fimm ár.
Svo fór hann út í það að selja innflutta matvöru frá ýmsum Asíulöndum í Kolaportinu. Hann opnaði svo verslun í Grafarvoginum í kjölfarið. Þessi rekstur endaði svo með stofnun Fisku á Nýbýlaveginum.
Meira en Asíubúð segir Árni Elvar
Fiska var fyrst um sinn aðallega asísk matvöruverslun en er í dag einhvers konar heimsmatvöruverslun með vörur frá mörgum heimsálfum. Árni Elvar segir að nú sé hann að reyna að losa verslunina við þann stimpil að vera bara „Asíubúð“ því vörurnar komi miklu víðar að. „Við erum bara með vörur alls staðar og erum að reyna að leggja asíska nafninu þannig að fólk viti að þetta er svona international búð. Maður verður bara að vita hvað maður á að kaupa inn því það selst alls ekki allt sem við kaupum inn. En við gerum okkar besta,“ segir Árni Elvar.
