Ryan Breslow, forstjóri greiðslufyrirtækisins Bolt, segir að hann hafi sagt upp öllu mannauðsteymi fyrirtækisins vegna þess að það hafi verið að „búa til vandamál sem voru ekki til“. Þetta sagði Breslow á ráðstefnu Fortune um nýsköpun á vinnumarkaði í vikunni, þar sem hann ræddi róttækar breytingar sem hann hefur ráðist í eftir að hann sneri aftur sem forstjóri fyrirtækisins.
„Við vorum með HR teymi (human resources) og það teymi var að skapa vandamál sem voru ekki til. Þau vandamál hurfu þegar ég lét fólkið fara,“ sagði Breslow í samtali við Fortune.
Segir fyrirtækið hafa misst fókusinn
Breslow stofnaði Bolt árið 2014 á meðan hann var í Stanford háskóla og fyrirtækið náði gríðarlegum vexti á árunum eftir það. Árið 2022 var Bolt metið á um 11 milljarða dollara en síðan fór að halla undan fæti. Breslow hætti sem forstjóri sama ár og árið 2024 hafði verðmat fyrirtækisins hrapað niður í um 300 milljónir dollara samkvæmt frétt Fortune.
Hann segir fyrirtækið hafa eytt of miklu fé og tekið slæmar ákvarðanir á vaxtarskeiðinu. Þegar hann sneri aftur sem forstjóri árið 2025 hafi hann þurft að reka fyrirtækið í því sem hann lýsir sem stríðsástandi.
Samkvæmt Breslow hafi Bolt á þessum tíma þróað með sér menningu þar sem starfsfólk varð of vant þægindum og hætti að leggja sig fram.
„Það hafði þróast ákveðin réttindatilfinning innan fyrirtækisins. Fólk fannst það hafa mikið vald og réttindi en lagði ekki sérstaklega hart að sér,“ sagði hann. „Að lokum þurfti einfaldlega að láta flesta þeirra fara.“
99 prósent gátu ekki aðlagast
Breslow segir að þegar hann tók aftur við stjórninni hafi hann gefið starfsfólki sem ráðið hafði verið af fyrri stjórnendum 60 daga til að aðlagast nýrri vinnustaðamenningu. Hann segir þó að „99 prósent“ hafi ekki getað aðlagast breytingunum.
Í kjölfarið hafi nær allt stjórnendateymi fyrirtækisins verið látið fara og fyrirtækið byggt upp aftur frá grunni.
Hann segir að Bolt hafi einnig hætt með fjögurra daga vinnuviku og ótakmarkað sumarfrí sem áður höfðu verið hluti af vinnustaðamenningu fyrirtækisins.
„Sem einhver sem var frumkvöðull í svokallaðri meðvitaðri stjórnunarhugmyndafræði þurfti ég að færa fyrirtækið aftur á mjög erfiðan stað, aftur á byrjunarreit“ sagði Breslow.
Starfsmönnum fækkað verulega
Bolt er nú með um 100 starfsmenn samkvæmt Breslow, sem er mun færra en þegar fyrirtækið var stærst. Hann segir nýja teymið vera yngra og duglegra.
„Við erum með lið sem er fjórðungur af stærðinni sem það var áður. Þetta er yngra fólk sem vinnur miklu harðar og með betri orku,“ sagði hann.
