Heima horfir Andri á sjónvarpið hvenær sem færi gefst og er sjónvarpsáhuginn slíkur að hann er farinn að íhuga að setja upp skjá á baðherberginu.
Við fengum gleðigjafann knáa í stutt spjall um eftirminnilega sjónvarpsþætti og kvikmyndir.
Það er alltaf stutt í grínið hjá Andra, hvort sem hann situr í sjónvarpssetti eða tekur að sér að halda uppi fjörinu á ýmsum mannamótum. Eftir að hann hætti að vinna á leikskóla hefur hann tekið að sér alls konar verkefni. Hann kemur fram bæði einn og með Guggu í gúmmíbát og tekur að sér að skemmta á alls konar viðburðum.
„Ég er að gigga mikið, bæði með Guggu í gúmmíbát og einn. Ég mæti með stemningskviss, veislustýri og fer með gamanmál á hinum og þessum viðburðum, allt frá gæsunum út í sogblettaglímu framhaldsskóla,“ segir Andri.
Andri átti stórleik í sjónvarpsseríunni Bannað að hlæja og komst í úrslitaþáttinn.
Laugardagarnir eru þó í sérstöku uppáhaldi. Andri hefur margsinnis komið við sögu í fótboltaþættinum Doc Zone á Sýn Sport, bæði sem gestur í setti og í innslögum utan stúdíósins. „Það er ekkert skemmtilegra en að fá allan enska boltann beint í æð.“
Þegar Andri horfir nokkur ár fram í tímann sér hann fyrir sér að gera meira af því sem hann gerir í dag. „Ef ég fæ að vinna við áhugamálin mín, fara reglulega á leiki í enska boltanum og vera í kringum skemmtilegt fólk, þá verð ég sáttur.“
Frá Paddington til Eiðs Smára með gamla hárið
Fyrstu sjónvarpsminningar Andra eru af Paddington og skrípói úr túbusjónvarpinu. Í dag horfir hann helst á gamanþætti og gamanmyndir og sækir gjarnan í íslenskt grín. Þættirnir sem Auðunn Blöndal kemur að eru í sérstöku uppáhaldi. „Eins og öll þjóðin þá fæ ég aldrei leið á þeim sjónvarpsþáttum sem Auðunn Blöndal kemur að.“
Andri segir nýjustu seríuna af Einni stjörnu fara frábærlega af stað og bíður spenntur eftir næsta þætti á Sýn+. „Svo finnst mér þriðjudagarnir frábærir því þá kemur nýr þáttur af Körfuboltakvöldi extra. Þeir eru ruglaðir, strákarnir í settinu þar.“
Hann hefur líka gaman af því að rifja upp gamla þætti.
Um daginn datt hann aftur inn í gamla þætti af Ískápastríði og hafði sérstaklega gaman af endurfundunum við Eið Smára Guðjohnsen.
Það var gaman að sjá Eið Smára með gamla hárið sitt.
Andri er enn ekki byrjaður að horfa á jólamyndir. Hann er búinn að gera upp hug sinn um hina sígildu spurningu um Die Hard og lætur sér yfirleitt ekki nægja fyrstu myndina. „Að mínu mati er Die Hard jólamynd og ég tek alltaf allavega fyrstu þrjár myndirnar fyrir hver jól.“
Síminn í vasann og sjónvarpið kannski á baðið
Heima í sófa setur Andri engar sérstakar reglur um hvað fólk má gera á meðan það horfir. Í bíó setur hann þó sjálfum sér eina. „Þegar ég fer í bíó fer síminn í vasann á meðan myndin er í gangi.“ Hann segist vera mikill símafíkill. Bíóið sé einn af fáum stöðum þar sem honum takist að láta símann eiga sig.
Heima horfir hann helst í sjónvarpinu en notar stundum fartölvuna. Hann leigir sér líka gjarnan mynd á leigunni hjá Sýn, sérstaklega eftir að hann flutti að heiman og fór sjálfur að bera ábyrgð á sjónvarpsreikningnum.
Blátt Doritos verður yfirleitt fyrir valinu þegar Andri fær sér sjónvarpssnakk. Þegar hann vill gera sérstaklega vel við sig kaupir hann Stjörnu partý mix.
Andri segist horfa á sjónvarpið nánast hvenær sem er dagsins og sér enn tækifæri til að fjölga þeim stundum.
Það styttist í að ég fari að setja upp skjá inn á baðherbergi svo ég geti horft á meðan ég tefli við páfann.
Hverjir eru uppáhaldsleikararnir þínir, íslenskir og erlendir?
„Það er erfitt að velja einn uppáhalds erlendan leikara. Ég er mikill Chris Tucker maður. Það hefur líklega enginn séð Rush Hour-myndirnar oftar en ég og svo er Charlie Sheen alltaf kóngurinn.
Hér heima finnst mér Þorsteinn Bachmann alltaf geggjaður og góður í að vera skemmtilegur í alvarlegum senum. Egill Ploder er líka einn af uppáhaldsleikurum mínum en hann átti stórleik í kvikmyndinni Fullir vasar. Ég held að margir velti enn þann dag í dag fyrir sér hvort hann hefði unnið til Edduverðlauna ef hann væri menntaður leikari.“
Hvaða þætti eða kvikmynd myndirðu vilja geta gleymt alveg, bara til að fá að horfa aftur í fyrsta sinn?
„Ég vildi óska að ég gæti gleymt þáttunum Rikki fer til Ameríku, bara til að geta séð þá aftur í fyrsta sinn. Þeir eldast eins og rauðvín og verða betri við hvert áhorf. Það sem sá maður getur borðað af góðum mat er alveg ruglað.“
Ef þér væri boðið í búningamatarboð og og allir gestirnir ættu að mæta sem persónur úr sjónvarpsþáttum eða kvikmyndum, hvernig myndirðu mæta til leiks?
„Ég myndi mæta sem Björn Bragi í Kviss. Mig langar í þetta þykka, svarta hár hans og svona „game show“-mottu. Ég get hvorki safnað svona hári né mottu sjálfur, en þetta yrði skemmtilegt matarboð. Einhver má endilega bjóða mér í búningamatarboð.“
Er einhver sjónvarpspersóna sem þú myndir helst vilja fara út að borða með?
„Ég myndi gera mikið til að fá að fara út að borða með Hvata úr sjónvarpsþáttunum Ríkinu. Auðunn Blöndal leikur hann. Hvati er alvöru meistari og það væri gaman að spjalla við hann um gellur og vinnustaðinn. Ætli við færum ekki á Fossinn.“
Ef þú fengir lítið hlutverk í sjónvarpsseríu, hvaða þætti myndirðu velja?
„Ég væri til í að fá hlutverk í Tekinn. Það væri geðveikt að fá að taka þátt í því að hrekkja einhvern.“
Ef þú mættir aðeins mæla með einum sjónvarpsþætti og einni kvikmynd við lesendur, hvað myndirðu velja?
„Ég myndi mæla með heimildarþáttunum um körfuboltamanninn Jón Arnór Stefánsson. Þau sem eiga eftir að sjá þá ættu að horfa og þau sem sáu þá á sínum tíma ættu að horfa aftur. Þetta eru frábærir þættir og sýna einnig hvað tíðarandinn var ruglaður í kórónuveirufaraldrinum. Svo er góður karakter í aukahlutverki þarna sem er Pavel Ermolinskij.
Grown Ups 2 er ein vanmetnasta mynd kvikmyndarsögunnar. Allir Íslendingar hafa pottþétt séð hana en ég mæli með því að horfa aftur og rifja upp þessa snilld.“
Ef þú mættir eyða einum karakter úr sjónvarpsþætti eða kvikmynd, hver fengi að fjúka?
„Það er bara eitt rétt svar við þessari spurningu og það er Dolores Umbridge úr Harry Potter. Allir sem horfa á Harry Potter hata þessa týpu í bleika gallanum.“
Þú situr fastur í lyftu í þrjár klukkustundir með þremur persónum úr sjónvarpsþáttum eða kvikmyndum. Hverja velurðu?
„Ég væri til í að festast í lyftu með með J.R. Ewing úr Dallas, Kenny úr We're the Millers og Sunnevu Einars úr þáttunum #Samstarf.“
Hvaða persóna úr sjónvarpsþætti eða kvikmynd væri líklegust til að verða besti vinur þinn í raunveruleikanum?
„Carter í kvikmyndinni Rush Hour væri klárlega besti vinur minn í alvörunni. Ég dýrka þessa týpu og sé margt í honum sem minnir mig á vini mína. Stifler í American Pie væri líka leikmaður sem yrði besti vinur minn og við myndum ná vel saman.“
Ef líf þitt væri kvikmynd, hvers konar mynd væri það og hvað héti hún?
„Ef líf mitt væri kvikmynd væri það Heimaleikurinn. Það er eins og þeir séu að taka knattspyrnuferilinn minn fyrir þegar þeir setja saman lið úr mönnum sem geta ekkert í fótbolta en hafa mikinn áhuga og vilja til að láta hlutina gerast. Ég mæli eindregið með þessari mynd. Hún sýnir svart á hvítu hvað félagsandinn er góður og hvað það er hollt að alast upp við að spila fótbolta. Hann er fyrir alla, sama hvort maður er góður eða lélegur.“
Veldu eina af uppáhaldsmyndunum þínum eða sjónvarpsseríunum frá útlöndum og skiptu erlendum leikara út fyrir íslenskan.
„Ég væri til í að taka Justin Timberlake út úr Friends with Benefits og setja sjálfan mig í staðinn. Það væri helvíti skemmtilegt að leika þetta hlutverk á móti Milu Kunis.“