Ný Maskínukönnun var birt í gær og voru helstu tíðindin að Viðreisn tapaði fylgi. Flokkurinn fór úr 11,4 prósenta fylgi niður í 9,2 prósent. Á rúmum mánuði hafa tveir flokksmenn gengið úr flokknum. Annars vegar Jón Gnarr sem gekk úr þingflokknum en styður samt sem áður ríkisstjórnina og hins vegar Ingvar Þóroddsson sem gekk í raðir Sjálfstæðismanna.
„Já, ætli skýringin sé ekki augljóslega sú að við vorum kosin til þess að taka alls konar ákvarðanir sem sumar hverjar eru erfiðar. Svo er það ekkert leyndarmál og auðvitað vel skjalfest að við höfum verið að ganga í gegnum svolítið erfiða tíma gagnvart Jóni Gnarr og Ingvari Þóroddssyni,“ segir Sigmar Guðmundsson, þingflokksformaður Viðreisnar, í Sprengisandi í morgun.
Hann sagðist þó ekki ætla að fella stóra dóma um skoðanakannanir sem gerðar eru á miðju kjörtímabili. Þetta séu samt sem áður niðurstöður og er ákveðin vinna þegar farin af stað innan flokksins.
„Ég held að í lok kjörtímabilsins séu flokkar frekar metnir út frá stöðu í efnahagsmálum og slíkum þáttum frekar en einhverjum sveiflum sem verða innan kjörtímabilsins.“
Hildur Sverrisdóttir, þingmaður Sjálfstæðisflokksins, tekur undir og segir að skoðanakannanir veiti ákveðna innsýn en séu ekki stóra verkefnið. Sjálfstæðisflokkurinn mældist með 22,3 prósenta fylgi í könnuninni.
„Ég held að það geti líka verið galli að vera of upptekin af skoðanakönnunum. Við erum í þessum hlutverkum því við viljum standa fyrir það sem við trúum á og taka þær ákvarðanir sem þarf en kannski ekki elta skoðanakannanir.“
Svik og sjokkerandi viðbrögð
Páll Magnússon, þáttastjórnandi Sprengisands, spurði Sigmar út í mismunandi viðbrögð flokksins við úrsögn þingmannanna tveggja. Sigmar segir að munurinn felist í stuðningi við ríkisstjórnina.
„Ingvar stillti hlutunum mikið þannig upp að það væri um svik að ræða og ég var svona góðfúslega að benda á að það er kannski erfitt að nota það hugtak þegar maður sem er kosinn af tíu prósentum fólks í Norðausturkjördæmi fer síðan yfir í flokk sem svo sannarlega þessi tíu prósent voru ekki að kjósa,“ segir Sigmar.
Í viðtali daginn sem Ingvar tilkynnti um úrsögnina sagðist hann telja sig vera að svíkja loforð sem hann gaf sínum kjósendum. Slíka stefnu hafi hann ekki getað stutt.
Hildur segir að Ingvar hafi einfaldlega ekki haft trú á verkefni ríkisstjórnarinnar.
„Þess vegna var það örlítið sjokkerandi, fannst mér, að sjá viðbrögðin þar sem Viðreisn hreinlega réðst á Ingvar. Ég held að það sé ekki hægt að orða það neitt öðruvísi. Það voru augljóslega sendir út talpunktar um hin sterku bein og að það þurfi sterk bein til að vera í ríkisstjórnarsamstarfi og svo framvegis,“ segir hún.
„Það get ég heils hugar tekið undir. Ég var hluti af ríkisstjórnarsamstarfi í sjö ár með Vinstri grænum og það reyndi nú aldeilis oft á. Maður fær alls ekki allt sem maður vill og þarf oft að kyngja hinu ýmsa.“
„Sem er einmitt punkturinn með Ingvar,“ skýtur Sigmar inn í.
Hildur svarar að það sé þó hægt ef þú hafir trú á verkefninu og hægt sé að réttlæta það fyrir sér sjálfum í stóra samhenginu. Ingvar hafi fært skýr rök fyrir úrsögninni, að Viðreisn stæði að því að hækka skatta þvert á kosningaloforð þeirra. Þá bendir hún á að Þorgerður Katrín Gunnarsdóttir, formaður Viðreisnar, hafi sjálf yfirgefið Sjálfstæðisflokkinn til að verða hluti af Viðreisn.
„En að sami flokkur skuli núna ekki ná upp í nef sér þegar kornungur maður, sem er augljóslega frjálslyndur hægrimaður, finnur sig einfaldlega ekki í Viðreisn lengur, gerir það heiðarlega og af sæmd að það sé sparkað í hann eins og er búið að gera alla þessa viku.“
Sigmar segir að það hafi verið stóra yfirmarkmiðið með myndun ríkisstjórnar Kristrúnar Frostadóttur að ná böndum á ríkisfjármálin.
„Það er oft mjög erfitt að fara í gegnum sumt af því. Það kallar á sterk bein. Það kallar á að menn missi ekki sjónar á þessu stærra markmiði sem er að nást, það er að segja að við erum að hætta að láta ríkissjóð safna skuldum.“
Með Jóni og Guðmundi Inga Kristinssyni, sem sagði sig úr Flokki fólksins geti ríkisstjórnin reitt sig á stuðning 35 þingmanna. Oft hafi meirihluti þingsins verið tæpari en svo.