„Það er aldrei til vinsælda fallið að vinna hjá eftirlitsstofnun en ég held að við höfum aldrei gengið í gegnum annað eins,“ segir Einar Örn Thorlacius, lögfræðingur MAST, í viðtali við DV, um framferði Árna Stefáns Árnasonar lögfræðings en hann er sá maður sem MAST hefur kært fyrir hótanir, ærumeiðingar, tilraunir til mútugreiðslna og töku búnaðar ófrjálsri hendi.
Sjá einnig: MAST kærir hótanir og ærumeiðingar gegn starfsmönnum til lögreglu
Einar Örn vísar meðal annars til Facebook-færslna varðandi sum hinna meintu brota og er því ekki um að villast hver hinn kærði er, þ.e. Árni Stefán Árnason.
„Þetta er erfitt starf, fólk er tengt dýrum tilfinningaböndum, en þarna gengur maðurinn bara allt of langt, hann hefur alla möguleika á að kæra ákvarðanir okkar til æðra stjórnvalds og til dómstóla, hann hefur reyndar gert það, og hann hefur farið fram á endurupptöku, hann hefur gert allt mögulegt, hann er bara svo yfirgengilegur,“ segir Einar.
Sakaði Einar um að eitra fyrir hundum
DV spurði Einar um ásakanir þess efnis að Árni Stefán hefði reynt að bera fé á starfsmenn MAST.
„Hann á margar Facebook-síður og þar hefur hann verið að bjóða yfirdýralækni og mörgum öðrum starfsmönnum peninga ef þeir skili inn dýrum. Hann hefur ekki boðið mér greiðslur en yfirdýralækni og fleirum.“
MAST kærir Árna Stefán einnig fyrir að taka búnað ófrjálsri hendi og segir Einar að það snúist um atvik sem átti sér stað að nóttu til í nágrannagarði skammt frá heimili Árna Stefáns í Hafnarfirði, en Árni Stefán hefur bæði verið með dýrahald í Hafnarfirði og í sumarhúsabyggð í Kjósinni.
„Það var sett upp búr í nágrannagarði við heimili hans í Hafnarfirði til að reyna að ná einhverjum dýrum og það náðist á mynd þegar hann kom og tók búrið í náttmyrkri,“ segir Einar.
Meintar ærumeiðingar Árna Stefáns eru margar og sumar í garð Einars sjálfs. Nefnir hann eitt dæmi um það:
„Það var frétt um að eitrað hefði verið fyrir hundum með frostlegi þarna í Kjósinni, þá sagði hann að ég hefði örugglega gert það af því ég hataði dýr. Þetta er svona dæmi um vitleysisganginn sem hann er með.“
Kannast ekki við það sem kemur fram í kærunni
DV óskaði viðbragða hjá Árna Stefáni við kæru MAST og sendi hann eftirfarandi svar í tölvupósti:
„Ég kannast ekki við neitt af því sem kemur fram á heimasíðu MAST en sjá viðhengi.“
Í viðhengjum eru fjórar lögreglukærur sem Árni Stefán hefur lagt fram á hendur ýmsum starfsmönnum MAST vegna vörslusviptinga á dýrum auk kvörtunar til forstjóra MAST sama efnis.
