Skæruliðasveitir Húta í Jemen héldu eldflaugaárásum á Sádi-Arabíu áfram í gærkvöld og nótt. Árás var gerð á eina af flugstöðvum alþjóðaflugvallarins í Riyadh í gærkvöld þar sem einn var drepinn og 11 særðust. Að auki skutu loftvarnakerfi niður aðra eldflaug nærri flugvellinum.
Þessi árás bætist ofan á aðra sem gerð var um sólarhring áður, þar sem 13 manns voru drepnir. Myndskeið af þeirri árás úr öryggismyndavélum var birt í morgun. Þá var einn drepinn í árás á flugvöllinn í Dammam.
Árásirnar eru afsprengi borgarastyrjaldarinnar í Jemen þar sem Hútar berjast á móti stjórnarhernum. Stjórnarherinn nýtur stuðnings Sádi-Arabíu meðan Íranar styðja Húta. Árásin á laugardag er sú mannskæðasta í Sádi-Arabíu í meira en áratug. Árásarhrina Húta hófst á miðvikudag og þeir hafa hótað frekari árásum á samgöngumannvirki í landinu.
Abdulaziz bin Salman prins, sem gegnir starfi orkumálaráðherra Sádi-Arabíu, segir að árásirnar hafi reynt á landið. „Við getum ekki gengið að orkuöryggi vísu. Atburðir síðustu vikna eru alvarlegir og svar okkar verður að vera jafn alvarlegt,“ sagði hann á orkumálaráðstefnu sem nú stendur yfir í Riyadh.
Flugvellinum í Ryiadh hefur verið lokað um óákveðinn tíma til að tryggja bæði öryggi og starfhæfni flugvallarins. Ekki hefur verið gefið út hversu lengi það verður en heimildarmenn AFP-fréttastofunnar segja að lokunin verði líklega fram eftir vikunni. Flugfélögin Etihad í Sameinuðu arabísku furstadæmunum og Gulf Air í Bahrein hafa þegar ákveðið að hætta flugi þangað tímabundið.
Donald Trump forseti Bandaríkjanna sagði eftir fyrri árásina á flugvöllinn að hann myndi skoða beina þátttöku í hernaði Sádi-Araba í Jemen. Hingað til hafa Bandaríkjamenn aðeins veitt aðstoð í gegnum leyniþjónustu. Bein þátttaka myndi flækja þá enn frekar í átök í Miðausturlöndum sem fara sífellt meira fyrir brjóstið á bandarískum almenningi.
