Sjálfsagt geta einhverjir hugsað sér að fara í sumarfrí án þess að hafa með sér bók. Þeim er ráðlagt að endurskoða þá afstöðu sína. Allt verður betra þegar góð bók er við hönd, líka sumarfríið. Það er sannarlega úr nógu að velja og hér er mælt með nokkrum bókum sem ættu ekki að valda vonbrigðum.
Metsölulistar samanstanda yfirleitt af glæpasögum, spennusögum og ástarsögum. Þess vegna hefur verið sérlega ánægjulegt að sjá Gyrði Elíasson taka toppsætið á metsölulista Eymundsson með nýjustu bók sinni Ótíð í víti.
Ótíð í víti er sláandi frásögn höfundar af baráttu sinni við þunglyndi sem varð svo djúpt að hann reyndi tvisvar á hálfu ári að svipta sig lífi. Þetta er einstök bók sem hlýtur að snerta djúpt hvern þann sem les. Í huga manns sitja orð læknisins sem sagði við Gyrði eftir fyrri sjálfsmorðstilraun hans: Þú ert þjóðargersemi…
Þau orð eru svo rétt. Gyrðir er höfundur með snilligáfu og bestu verk hans eru á heimsmælikvarða.
Þeir sem vilja glaðlega lesningu snúa sér að úrvali bestu smásagna Þórarins Eldjárns sem Kristján Þórður Hrafnsson valdi, jafnframt því að skrifa eftirmála. Þessi bók er sannur gleðigjafi því Þórarinn er fyndinn og hugmyndaríkur höfundur. Sérstakt uppáhald þeirrar sem þetta skrifar er Síðasta rannsóknaræfingin, drepfyndin smásaga sem hlýtur að flokkast sem sígild.
Jónína Leósdóttir er sannarlega fyndin í nýjustu bók sinni Algjör Perla og skapar þar skemmtilega og eftirminnilega persónu. Söguhetjan sem er 75 ára gömul lendir á spítala og er óróleg vegna þess að henni liggur á að losna við lík sem er heima hjá henni.
Fléttan er alls ekki það áhugaverðasta við söguna heldur aðalpersónan Perla sem er sérvitur og sjálfstæð og svo sérstök að lesandinn getur ekki annað en heillast af henni.
Agatha Christie býður yfirleitt alltaf upp á notalega spennu. Það á sannarlega við um bókina Varhugavert vor sem geymir safn smásagna hennar. Formáli bókarinnar er eftir Christie sjálfa en þar lýsir hún því þegar hún kynntist óttanum í fyrsta sinn tæplega fimm ára gömul.
Smásögur bókarinnar snúast flestar um morð, rán og fleira sem í daglegu lífi er óskemmtilegt en verður hér að afar þægilegri lestrarupplifun. Svo er einfaldlega alltaf gaman að vera í félagsskap Hercule Poirot og ungfrú Marple.
Skylt er að nefna franska rithöfundinn George Simenon, sem hlýtur að teljast með afkastamestu rithöfundum sögunnar. Á ferlinum skrifaði hann rúmlega 400 skáldsögur, þar af 75 um lögregluforingjann Maigret. Guli hundurinn er ein þeirra.
Maigret rannsakar einkennilega atburði í frönskum strandbæ en svo virðist sem einhver ætli sér að ráða helstu áhrifamenn bæjarins af dögum. Gulur hundur vappar um.
Þetta er snjöll ráðgáta þar sem merkja má ákveðna fyrirlitningu höfundar á manneskjum sem telja sig yfir aðrar hafnar. Hinn rólegi Maigret ræðir við fólk meðan hann lítur í kringum sig, dæmir engan hart og virðist skilja ansi margt.
Dan Brown er einn af metsöluhöfundum heimsins. Hann varð stórstjarna með Da Vinci lyklinum sem er svo spennandi að þegar hún kom út hér á landi hringdu einhverjir lesendur í vinnuna og lugu upp á sig veikindum til að fá frið til að klára bókina. Í kjölfarið komu misgóðar bækur, jafnvel lélegar. Brown er í fínu formi í Hinn æðsti leyndardómur þar sem táknfræðingurinn Robert Langdon er í Prag ásamt kærustu sinni sem á að halda þar fyrirlestur. Hún hverfur og hvarfið tengist óútkominni bók sem hún hefur skrifað.
Þetta er rúmlega sex hundruð blaðsíðna skáldsaga sem hefði vissulega mátt vera mun styttri, en er samt prýðileg afþreying. Brown leggst venjulega í mikla heimildavinnu við gerð bóka sinna og hér beinir hann sjónum að hugmyndum sem einhverjir vísindamenn aðhyllast um vitundina, sálina og líf eftir dauðann. Afar áhugavert efni sem vinnur með sögunni. Prag verður síðan svo lifandi í bókinni að lesandann dauðlangar þangað.
Hinn norski Jo Nesbö er mistækur glæpasagnahöfundur en er í fínum gír í Stund úlfsins sem gerist í Bandaríkjunum. Vopnasali er myrtur og leit hefst að morðingjanum en sá á harma að hefna. Bókin er spennandi og í henni er afar óvænt uppljóstrun, sem er alltaf kostur í glæpasögum.
Sá núlifandi glæpasagnahöfundur sem er í mestu uppáhaldi hjá þeirri sem þetta skrifar er hinn sænski Leif GW Persson. Sanna sagan um nefið á Gosa er komin út í íslenskri þýðingu og þar er hinn mjög svo breyski Evert Bäckström lögregluforingi í aðalhlutverki og rannsakar morð en sagan teygir sig einnig til Rússlands. Það er ekki oft sem maður skellir upp úr við lestur glæpasagna en það á við um bækurnar um Bäckström sem er aðalpersóna í nokkrum bókum þessa snjalla höfundar.
Ekki má svo gleyma lesefni fyrir ungmenni. Ein þeirra bóka sem sú sem þetta skrifar las fyrir síðustu jól sér til mikillar ánægju er Hobbitinn eftir Tolkien í afar góðri þýðingu Solveigar Sifjar Hreiðarsdóttur en Bragi Valdimar Skúlason þýðir bundna málið. Bókin seldist upp enda vinsældir Hobbitans miklar hér á landi eins og annars staðar. Verkið hefur nú verið endurútgefið, enn veglegra og með myndum. Lesendahópurinn er breiður, frá unglingum til ellibelgja sem gleyma sér í sögunni um ævintýri hins heimakæra Bilbó Bagga sem lendir í æsilegum ævintýrum. Saga sem gerir sumarfríið enn skemmtilegra, ekki síst fyrir ungmenni.
