Guðlaugur Þór Þórðarson sagði í hlaðvarpsþættinum Bakslaginu að einstaklingar sem kæmu til Íslands en vildu ekki aðlagast íslensku samfélagi ættu að yfirgefa landið. Hann sagði það skipta litlu máli hvort slíkar aðgerðir væru kallaðar fjöldabrottvísanir eða eitthvað annað.
Umræðan hófst þegar Sverrir spurði hvort fara ætti í fjöldabrottvísanir á þeim sem neituðu að aðlagast íslensku samfélagi.
„Ef þú ert ekki tilbúinn að fara eftir reglum landsins, takk og bless,“ svaraði Guðlaugur.
„Absolút“
Sverrir sagði að margir slíkir einstaklingar væru á Íslandi og spurði hvort fara ætti í fjöldabrottvísanir á þeim hópi.
Guðlaugur sagðist ekki festa sig við hugtakanotkunina.
„Ég veit ekki hvort það er fjölda eða einstaklings, hvað það nú kallast,“ sagði hann.
Helgi benti þá á að um væri að ræða einstaklinga sem féllu undir þessa skilgreiningu og spurði hvort Guðlaugur væri einfaldlega að segja að þeir ættu að fara.
„Absolút, absolút,“ svaraði Guðlaugur.
Segist heyra sögur úr sínu nærumhverfi
Guðlaugur sagði afstöðu sína byggja á því sem hann hefði heyrt úr sínu nærumhverfi.
„Ég er bara að heyra úr mínu umhverfi, ég ætla ekki að segja upp á hvern eða vera mjög nákvæmur, en um fólk sem ætlar sér ekki að aðlagast og er með hegðun sem er algjörlega óásættanleg.“
Hann sagði jafnframt að hann heyrði ítrekað um börn og ungmenni sem yrðu fyrir alvarlegum atvikum.
„Ég er að heyra bara um börn og ungmenni sem eru að verða fyrir hræðilegum hlutum, og þetta er búið að viðgangast það lengi að það eru engar afsakanir í þessu öllu.“
Ber Ísland saman við önnur lönd
Guðlaugur sagði að sama sjónarmið ætti við um Íslendinga sem flyttu til annarra ríkja og að þeir Íslendingar sem flytja erlendis gætu ekki ætlast til að snúa öllu við eins og þeim þóknist.
„Og það er nákvæmlega það sama hér.“
Guðlaugur sagði að ekki væri eðlilegt að opinber kerfi þyrftu sífellt að takast á við einstaklinga sem vildu ekki aðlagast.
„Þú getur ekki verið með lögregluna, eða félagsmálayfirvöld, eða alla skólana á öðrum endanum út af einstaklingum sem vilja ekki aðlagast. Punktur.“
Að lokum ítrekaði hann að honum væri sama hvaða heiti væri notað yfir slíkar aðgerðir.
„Það sem ég veit hins vegar er að ef þú aðlagast ekki reglunum hérna, þá átt þú að fara. Ef það heitir fjöldabrottvísanir, þá er það bara þannig.“
Hér er að sjá myndbrotið hér fyrir neðan en hægt er að horfa á allan þáttinn á Spotify og Youtube.
