Skúli Mogensen, fyrrverandi forstjóri WOW air, segir að helsti vandi Icelandair liggi ekki í kjarasamningum við flugmenn heldur í grunnrekstri félagsins og skorti á skýrri stefnu. Þetta kemur fram í færslu sem Skúli birti á Facebook þar sem hann lýsir yfir áhyggjum af stöðu félagsins og áhrifum hennar á íslenska ferðaþjónustu.
Skúli segir að afkoma Icelandair undanfarin ár sýni að vandinn sé kerfislægur. Hann bendir á að mörg af stærstu flugfélögum heims hafi skilað methagnaði eftir COVID faraldurinn á meðan uppgjör Icelandair hafi ítrekað verið undir væntingum stjórnenda og markaðarins.
„Vandi Icelandair snýr að grunnrekstri þess og stefnu, eða öllu heldur stefnuleysi,“ skrifar hann.
Segir flugflotann of flókinn og kostnaðarsaman
Að mati Skúla er eitt stærsta vandamál félagsins samsetning flugflotans. Hann bendir á að Icelandair reki í dag um 50 flugvélar af mörgum mismunandi tegundum, þar á meðal Boeing 737 MAX, Airbus A321LR, Boeing 757, Boeing 767 og Dash 8 vélar.
Hann segir þetta skapa mikið flækjustig í rekstrinum þar sem hver vélategund krefjist sérhæfðra flugmanna, flugliða, vélvirkja, varahluta og skipulags.
„Fyrir lítið flugfélag á alþjóðlegan mælikvarða er svona fjölbreyttur og flókinn flugfloti gríðarlega kostnaðarsamur og ekki sjálfbær,“ segir Skúli.
Þá bendir hann einnig á að margar vélar félagsins séu orðnar gamlar, sem leiði til aukins viðhalds og meiri eldsneytisnotkunar.
Hann telur að félagið eigi að einfalda flotann verulega og velja annaðhvort Boeing MAX eða Airbus sem framtíðarlausn.
Vill selja starfsemi utan kjarnarekstrar
Skúli gagnrýnir einnig hversu fjölbreytta starfsemi Icelandair reki utan hefðbundins farþegaflugs. Hann telur að félagið hafi misst fókus með því að sinna of mörgum sviðum samtímis.
Meðal þeirra rekstrareininga sem hann telur falla utan kjarnastarfsemi félagsins eru flugfrakt, leigustarfsemi, ferðaskrifstofa, rekstur flugherma, fasteignir og innanlandsflug.
Hann segir margar þessara eininga vera vel reknar en telur að þær gætu dafnað betur sem sjálfstæð félög með eigin stefnu.
„Nauðsynlegt er að taka eitt skref afturábak áður en hægt er að taka tvö skref áfram,“ skrifar hann.
Skúli leggur áherslu á að hann sé ekki að tala fyrir því að „arðræna“ Icelandair með niðurbroti félagsins heldur að selja starfsemi utan kjarnarekstrar og nýta andvirðið til að fjármagna endurnýjun flugflotans.
Segist hafa áhyggjur af áhrifum á Ísland
Að lokum segir Skúli að hann skrifi þetta fyrst og fremst vegna þess að hann hafi verulegar áhyggjur af stöðu Icelandair og þeim áhrifum sem veik staða félagsins gæti haft á íslenska ferðaþjónustu og lífsgæði landsmanna ef hún heldur áfram að versna.
„Hjá Icelandair starfar mikið af öflugu og reynslumiklu fólki, þar á meðal flugmenn, sem hafa á undanförnum árum gert margt mjög vel.“
