Íslenska ríkið sendir tíu manna sendinefnd á loftslagsráðstefnu Sameinuðu þjóðanna, COP31, sem stendur yfir í Tyrklandi.
Jóhann Páll Jóhannsson, umhverfis-, orku- og loftslagsráðherra, sækir ráðstefnuna og tekur meðal annars þátt í formlegum hliðarviðburðum og málstofum, eins og það er orðað í svari umhverfis-, orku- og loftslagsráðuneytisins við fyrirspurn fréttastofu.
Þá mun hann sitja tvíhliða fundi með öðrum ráðherrum og leiðtogum alþjóðastofnana. Einnig segir að Jóhann Páll skipuleggi hliðarviðburð með Norrænu ráðherranefndinni um veltihtingrás Atlantshafsins (AMOC).
Aðstoðarmaður Jóhanns Páls, Jóna Þórey Pétursdóttir, verður með í för auk skrifstofustjóra loftslagsmála hjá ráðuneytinu.
Alls greiðir ríkið fyrir þáttöku og ferðalög fimm starfsmanna umhverfis-, orku- og loftslagsráðuneytisins, fjögurra starfsmanna utanríkisráðuneytisins auk eins ungmennafulltrúa.
Alls sækja 49 manns ráðstefnuna undir íslenskum formerkjum að einhverju leyti, langflestir á eigin vegum. Þeirra á meðal eru Katrín Jakobsdóttir, fyrrverandi forsætisráðherra, og þingmennirnir Njáll Trausti Friðbertsson, Sjálfstæðisflokki, og Eiríkur Björn Björgvinsson, Viðreisn.
