Alls greiddu 54,95% kosningabærra borgarbúa atkvæði í kjördeildum víðs vegar í Reykjavík á laugardag, 3,7% meira en í síðustu sveitarstjórnarkosningum 2022.
Kjörsókn var mest 67,17% í Fossvogsskóla og minnst 40,58% í Fjölbrautaskólanum í Breiðholti. Hún jókst mest í Rimaskóla milli sveitarstjórnarkosninga, eða um 7,35%, en dróst saman um 2,4% í Hagaskóla.
Þegar litið var til einstakra hverfa jókst hún einna mest í Grafarvogi og Grafarholti. Auk Rimaskóla var einnig 5,31% aukning í Foldaskóla og 6,03% aukning í Borgarskóla.
Oddvitar Sjálfstæðisflokksins og Framsóknarflokksins ræða áframhaldandi samstarf í Múlaþingi. Staða núverandi meirihluta sveitarstjórnar í Múlaþingi styrktist í sveitarstjórnarkosningum á laugardag.
Sjálfstæðisflokkurinn bætti við sig einum fulltrúa og er því með fjóra á meðan Framsókn hélt sínum þremur.
Viðræður ganga vel, segir Berglind Harpa Svavarsdóttir, oddviti Sjálfstæðisflokksins. Hún fundar þessa dagana með Jónínu Brynjólfsdóttur, oddvita Framsóknar.
Þær stefna á að vera komnar með meirihluta innan næstu tíu daga.
„Sem keppnismaður varð maður náttúrulega bara fúll svona strax á eftir, en svona raunhæft að líta á þetta og sætta sig við niðurstöðuna, þá er maður bara kominn núna í gírinn að undirbúa sig undir að vera með gott aðhald í minnihluta,“ segir Pétur Marteinsson, oddviti Samfylkingarinnar í Reykjavík.
Samfylkingin hafi bætt við sig fulltrúum á landsvísu og sé því í sterkri stöðu.
„Í Reykjavík höldum við okkar fimm borgarfulltrúum, sem hefur ekki verið trendið síðustu kosningar, við höfum venjulega verið að missa alltaf einn. Miðað við kjörtímabilið sem er að ljúka og kosningabaráttuna, það sem ég fann alveg að það væri brekka og mótvindur, þá held ég að við getum bara vel við unað.“
„Hins vegar var maður með önnur markmið. Markmiðið var að fá inn sjött og jafnvel sjöunda borgarfulltrúann en það gekk ekki upp,“ segir Pétur.
Hann telur líklegast að Sjálfstæðisflokkurinn myndi meirihluta með Miðflokknum..
„Það er síðan náttúrulega möguleiki, ef þetta gengur ekki upp, að það verði bankað hérna hjá mér og við förum að ræða einhvern meirihluta milli Samfylkingar og Sjálfstæðisflokks. En ég held að það sé býsna langt í það.“
Á Hornafirði er samstarf Framsóknarflokks og Sjálfstæðisflokks í sjónmáli.
Þar var Framsóknarflokkurinn hlutskarpastur í nýliðnum kosningum, með rétt tæp 45% atkvæða. Oddviti þeirra, Hjalti Þór Vignisson, segir formlegar viðræður hafnar um meirihlutasamstarf við Sjálfstæðisflokkinn.
Síðustu ár hefur Sjálfstæðisflokkurinn verið þar í meirihluta ásamt Kex-framboðinu. Kex-framboðið fékk aftur á móti ekki góða kosningu í þetta sinn og missti um helming síns fylgis og annan tveggja fulltrúa í sveitarstjórn.
„Samtalið hefur gengið prýðilega,“ segir Hjalti og bætir við að hann sé bjartsýnn á framhaldið. Þau eiga fund í dag klukkan 16 og þá verða línurnar lagðar um framhaldið.
Hjalti á ekki von á því að meirihluti verði myndaður fyrir helgina; „Við viljum vanda okkur.“
Góðan dag, Ólöf Rún Erlendsdóttir situr hér við lyklaborðið, fréttamaður á Akureyri. Ég verð límd við símann og tölvuna í dag og ætla að tryggja ykkur nýjustu tíðindi af meirihluta viðræðum á landsbyggðinni.
Endilega komið til okkar ábendingum um stöðu mála í ykkar heimabyggðum: frettir@ruv.is.
Tíðindin frá Akureyri eru þessi:
Oddvitar Sjálfstæðisflokks, L-listans og Framsóknarflokks, áttu fund um myndun meirihluta í morgun. Þau hófu viðræður strax daginn eftir kosningar og segja oddvitar það samtal ganga vel. Að öðru leyti gefur þríeykið lítið upp, annað en að viðræðum verði haldið áfram.
Sjálfstæðisflokkurinn og Framsóknarflokkurinn í Fjarðabyggð tilkynntu í gær að þeir hefðu ákveðið að hefja formlegar meirihlutaviðræður um áframhaldandi samstarf flokkanna á komandi kjörtímabili.
Meirihluti flokkanna hélt í kosningunum. Þó að hvor flokkur hafi misst einn fulltrúa geta þeir myndað meirihluta með fimm fulltrúum af níu.
Samfylkingin fékk tvö sæti og Miðflokkurinn tvö.
Hildur Björnsdóttir, oddviti Sjálfstæðisflokksins í Reykjavík, er með öll spil á hendi fyrir meirihlutaviðræður. Hún fundaði með öðrum oddvitum í gær en heldur spilunum þétt að sér.
Sjálfstæðisflokkurinn bætti við sig þremur fulltrúum í Reykjavík og er því með níu. Þrír flokkar hafa verið orðaðir við meirihluta með Sjálfstæðisflokki, Miðflokkurinn, Framsóknarflokkurinn og Viðreisn.
Sjálfstæðisflokkurinn á mesta samleið með Framsóknarflokki, samkvæmt greiningu á svörum oddvita í kosningaprófi RÚV.
Hér má sjá greiningu á málefnalegri samleið flokkanna í Reykjavík.
Einar Þorsteinsson er eini fulltrúi Framsóknar, sem missti þrjá fulltrúa, Miðflokkurinn fékk þrjá og Viðreisn bætir við sig einum og er þá með tvo.
Samfylkingin heldur sínum fimm sætum, Vinstrið fékk tvo fulltrúa og Sósíalistaflokkur Íslands missti einn.
Tveir flokkar þurrkuðust út úr borgarstjórn, Píratar og Flokkur fólksins.
Áhugaverð staða er að teiknast upp í Norðurþingi þar sem fjórir flokkar, sumir nokkuð ólíkir, funda í dag og freista þess að mynda meirihluta.
Níu fulltrúar sitja í sveitarstjórn Norðurþings og voru Sjálfstæðismenn og Framsókn í meirihluta. Hvor þeirra er með tvo fulltrúa eftir að Framsókn missti einn í nýafstöðnum kosningum. Þeir funda með oddvita Samfylkingarinnar, sem bætti við sig fulltrúa, og Óskalistans.
Oddviti Sjálfstæðisflokksins segir flokkana funda um hlutverkaskiptingu í dag. Takist það sé hún nokkuð örugg um að þeir nái saman um málefnin.
Þá yrðu aðeins fulltrúi Miðflokksins og fulltrúi Vinstri grænna í minnihluta í Norðurþingi.
Oddvitar framboða funda víða um landið og freista þess að ná saman um meirihluta í sveitarstjórnum á nýju kjörtímabili. Við ætlum að fylgjast með framvindunni og taka púlsinn á sveitarstjórnarmyndun um allt land.
Velkomin á lifandi fréttavakt þar sem við fylgjumst með vendingum í kjölfar sveitarstjórnarkosninga.
