Jóhannes Anton Antonsson lést um síðustu helgi. Jóhannes var í blóma lífsins, átti enn um tvo mánuði eftir í tvítugsafmælið. Hann féll fyrir eigin hendi.
Sigríður Tinna Ben Einarsdóttir er mikill vinur fjölskyldunnar sem nú syrgir svo sárt, en hún er æskuvinkona systur Jóhannesar, Hildar Rósar Guðbjargardóttur. Sigríður hefur efnt til fjársöfnunar fyrir hina syrgjandi fjölskyldu en hún segir á Facebook-síðu sinni:
„Guðbjörg Svandís og fjölskylda hennar lentu í þeirri hræðilegu lífsreynslu að missa Jóhannes, son sinn og bróður, síðastliðna helgi í blóma lífsins. Jóhannes hefði orðið tvítugur núna í ágúst og átti allt lífið sitt framundan.
Sorgin er ólýsanleg og næstu skref þyngri en orð fá lýst fyrir alla sem þekktu og elskuðu þennan fallega, skemmtilega og yndislega dreng.
Þegar svona hörmulegir atburðir eiga sér stað er það það síðasta sem maður vill að fjárhagsáhyggjur standi í vegi fyrir því að fólk geti syrgt í friði með sínum nánustu. Guðbjörg hefur með þrautseigju og dugnaði alið upp fimm yndisleg börn og það brýtur hjarta mitt að hugsa til þess að hún þurfi að bera fjárhagslega byrði ofan á það að hlúa að sjálfri sér og börnum sínum, ásamt því að kveðja yngsta son sinn.
Ég hef því ákveðið, með góðfúslegu leyfi Guðbjargar og fjölskyldu hennar, að stofna styrktarreikning í nafni Hildar Rósar systur Jóhannesar, svo þeir sem vilja geti lagt sitt af mörkum til að styðja fjölskylduna á þessum erfiða tíma.
Söfnunin er ætluð til að hjálpa til við útfararkostnað og létta undir með fjölskyldunni á komandi tímum.
Margt smátt gerir eitt stórt
Fyrir þá sem vilja styðja fjölskylduna fjárhagslega á þessum erfiða tíma skal bent á reikningsupplýsingarnar hér að neðan. Hafa má í huga að öll framlög eru mikilvæg, líka smá framlög, því margt smátt gerir eitt stórt:
Reikningsnúmer: 0123-15-258060
Kennitala: 280492-3379
Í þessari frétt er fjallað um sjálfsvíg. Ef einstaklingar glíma við sjálfsvígshugsanir er bent á Hjálparsíma Rauða krossins 1717 og netspjall Rauða krossins 1717.is. Opið allan sólarhringinn. Einnig má hafa samband við Píeta-samtökin sem veita ókeypis ráðgjöf í síma 552-2218, allan sólarhringinn. Netspjall Heilsuveru þar sem svarar hjúkrunarfræðingur er líka opið frá kl.8-22 alla daga. Fyrir þau sem misst hafa ástvin í sjálfsvígi má fá stuðning í sorg hjá Sorgarmiðstöð og hjá Pieta samtökunum.
Færslu Sigríðar Tinnu á Facebook má sjá með því að smella á tengilinn hér fyrir neðan:
