Mótmælendur úr röðum óánægðra kennara réðust inn í menntamálaráðuneytið í Mexíkóborg í gær. Þeir hafa gripið til nokkuð umsvifamikilla mótmæla í borginni á síðustu dögum. Skammt er í að HM karla í fótbolta hefjist en Mexíkó er á meðal þriggja gestgjafaþjóða mótsins. Kennararnir hafa hótað því að setja mótið í uppnám ef ekki verður komið til móts við kröfur þeirra.
Lögregla beitti mótmælendur táragasi en þeir notuðu ljósastaura til að brjóta sér leið inn í ráðuneytið.
Claudia Sheinbaum forseti Mexíkó sagði í gær að hún ætlaði ekki að „falla í þá gryfju“ að kveða niður mótmælin. Þess í stað hefur hún óskað eftir viðræðum við mótmælendur. Þeirra kröfur eru auknar launahækkanir og að ný lög um eftirlaun verði felld úr gildi.
Stjórnvöld hafa komist að samkomulagi við stjórn mexíkóska kennarasambandsins um 9% launahækkun. Kröfur kennaranna hljóða aftur á móti upp á 100% hækkun launa.
Yfirvöld létu mótmæli kennara nokkuð afskiptalaus á þriðjudag. Þá veltu þeir nokkrum styttum af fótboltamönnum um koll. Á mánudag var táragasi beitt gegn mótmælendum við eitt af aðaltorgum Mexíkóborgar þar sem unnið er að uppsetningu aðdáendasvæðis fyrir heimsmeistaramótið.
