Beðið er eftir leiknum af mikilli eftirvæntingu en GTA 5 naut gífurlegra vinsælda á þremur kynslóðum leikjatölva og PC-tölvum í gegnum árin.
Sjá einnig: Troðið út úr dyrum í útgáfupartýi vegna GTA 6
Leikurinn gerist í borginni Vice City og á nærliggjandi svæðum í ríkinu Leonida en í raunheimum kallast þessir staðir Miami og Flórída.
Þessir staðir voru fyrst heimsóttir í leiknum GTA: Vice City sem kom út árið 2002. Færa má rök fyrir því að sá leikur hafi lagt línurnar að þeim GTA-leikjum sem fólk kannast við í dag en hann naut gífurlegra vinsælda á heimsvísu.
Sjá einnig: Mæta Vice City í NBA deildinni
Vice City gerðist árið 1986 en að þessu sinni gerist GTA 6 í nútímanum og fangar útlit borgarinnar að mörgu leyti ásýnd Miami í dag.
Leikurinn verður auglýstur á strætisvögnum, lestum, á ströndum Miami og veggjum bygginga í borginni, svo eitthvað sé nefnt. Þá mun klúbburinn E11EVEN Miami taka nafnið NINE1NINE, sem er nafn klúbbsins í Vice City, og verður haldið þar stórt útgáfupartí á föstudaginn.
AP-fréttaveitan segir að starfsmenn Rockstar, sem gerðu leikinn, hafi heimsótt suðurhluta Flórída og varið þar tíma í að fanga andrúmsloftið og merkilega staði til að hafa með í leiknum. Þeir kynntu sér sögu Miami og arkitektúr og tóku einnig viðtöl við fólk eins og fyrrverandi lögregluþjóna og glæpamenn.
Birtu ítarlega yfirferð
Eins og í GTA 5 verður hægt að spila fleiri en eina persónu en leikurinn mun fjalla um þau Jason og Luciu.
Í ágúst birti Rockstar nærri því hálftíma langt myndband þar sem kafað var í spilun GTA 6. Myndbandið var fyrst birt á Netflix.
Myndbandið hófst á því að þau Jason og Lucia eru að sækja eitthvað fyrir mann sem kallast Boobie. Sjá má Jason klappa hundi og virðist hann fá einhver stig fyrir það, sem gefur til kynna að leikurinn sé með einhvers konar heiðurskerfi, eins og Red Dead Redemption 2, þar sem maður fékk jákvæð stig fyrir að koma vel fram við fólk og dýr og neikvæð stig fyrir að skjóta fólk.
Sjá einnig: Líkindi með Grand Theft Auto og Red Dead Redemption
Vopnakerfi leiksins virðist líka vera svipað og í RDR2 þar sem Jason sést skipta milli skammbyssu og haglabyssu. Þá sést Jason einu sinni hægja á tímanum, eins og í RDR2, til að ná nákvæmu skoti.
Leikurinn verður aðgengilegur hér á landi á aðfaranótt fimmtudags.