„Þetta eru vondar fréttir, það er vont að missa góðan liðsmann,“ sagði Björg Magnúsdóttir, forseti borgarstjórnar og oddviti Viðreisnar, um breytingar á þingflokki Viðreisnar en hún var til viðtals í Bítinu á Bylgjunni.
Hún sagði Ingvar Þóroddsson öflugan þingmann en eins og fram kom í gær gekk hann til liðs við þingflokk Sjálfstæðisflokksins. Áður hefur Jón Gnarr gengið úr flokknum en styður hann þó á þingi.
„Þetta er ekki skemmtiefni, það gefur augaleið.“
Hún sagði þetta ekki hafa áhrif í flokkinn í borginni. Þar hefðu þau sterkan fókus á sín mál og sitt sveitarfélag. Þau væru samt sem áður í samskiptum við þingflokkinn og vinni sum mál saman, eins og samgöngusáttmálann og Sundagöngin.
„En annars erum við í okkar sílói með okkar verkefni,“ segir hún en að auðvitað hafi þetta áhrif á flokkinn.
Spurð hvort hún hafi áhyggjur segir Björg að þessi staða gefi tilefni til að setjast niður og skoða hvað er í gangi.
„Þetta eru stjórnmálin,“ segir hún um þetta og að það sé alvanalegt að þegar staðan sé þung í stjórnmálum færi fólk sig til.
Skipti máli að vera í stöðugum samskiptum
Hún segist sjálf vera í stöðugum samskiptum við sitt fólk og það skipti máli að halda í hópinn, sérstaklega í gegnum erfið verkefni.
„Það er verkefnið, og það er ótrúlega krefjandi. Það þarf að taka erfiðar ákvarðanir.“
Hún segir Viðreisn hafa fundað í haust en það þurfi meira að setjast niður og ræða hvert á að stefna.
„Það er augljóst.“
Margmenni á menntafundi
Björg var til viðtals í Bítinu um fund sem haldinn var í ráðhúsinu í gær um menntamál. Þar komu saman um 80 manns til að fara yfir stöðuna, kennarar, starfsfólk frístunda, fulltrúar foreldra og stjórnendur skóla. Þá hafi fulltrúar LKennarasambandsins verið á staðnum. Umræða hafi farið fram á tíu borðum þar sem ólík málefni voru rædd, til dæmis PISA, námskrá, eftirsóknarverð störf, samspil milli skólastiga og mælingar.
Björg segir fundinn hafa gengið gífurlega vel og það skipti máli að hafa fulltrúa skóla og heimilis á slíkum fundi því gott samstarf þeirra á milli sé lykilatriði.
Hún segir mælingar skipta gífurlegu máli og þegar til dæmis barn fær einhver frávik í málþroskaprófi í leikskóla eigi að setja inn stuðning strax og þannig sé hægt að fyrirbyggja vandamál seinna í leiðinni.
Ekki mikill niðurskurður í samhengi við annað
Hvað varðar gagnrýni á að tala um sókn í menntamálum og að vera að boða hagræðingu á sama tíma bendir Björg á að Reykjavík sé stærsta sveitarfélagið og tekjur þess um 230 milljarðar á ári. Hundrað milljarðar fari strax í skóla- og frístundasvið til að halda uppi sviði þar og að krafa sé um hagræðingu um einn milljarð þar sé aðeins eitt prósent af þessum heildarkostnaði.
„Í samhengi hlutanna er þetta ekki fáránlega há upphæð,“ segir hún og að öll sveitarfélög vinni nú að því að koma sér inn í einhvern ramma og að fyrir kosningar sé oft verið að spreða. Þetta sé allt til skoðunar.
Hún segir að á fundinum hafi það verið ljóst að það sé margt sem þau geti gert betur eða öðruvísi. Þau geti verið í þéttara samstarfi við ríki og önnur sveitarfélög og spyr í því samhengi hvað það kosti að auka yndislestur og leikgleði.
„Þarf það að kosta marga milljarða? Eða er þetta meira þjóðarátak og hugarfarsbreyting?“
Hún segir misjafnt eftir skólum hvernig símafríið var útfært og borgin hafi varið milljónum í það. Hún hafi heyrt frá stjórnendum að nú sé „ys og þys“ á göngum skólanna og þetta hafi augljóslega aukið skólabraginn.
„Krakkarnir eru að horfast í augu og gera eitthvað skemmtilegt í stað þess að horfa á símann í frímínútum.“
Björg segir engan geta gert neitt einn og það hafi verið upphafspunktur fundarins í gær. Það sé nú verið að greina niðurstöður og þær muni liggja fyrir um hádegisbil vonandi. Hún segir að það sé nauðsynlegt að aðgerabinda stórar hugmyndir og á hennar borði hafi komið fram tvær skýrar aðgerðir. Það sé áhugi á að búa til súpergrúppu kennara til að skoða kennsluaðferðir í ólíkum skólum og þessi hópur geti svo farið á milli skóla og kynnt kennara fyrir bestu aðferðunum. Það geti snúið að gagnreyndum lestraraðferðum, hvernig sé best að takast á við eitthvað ákveðið vandamál. Skólarnir glími við ólíkar áskoranir, nemendahópa.
Hún sagði að á hennar borði hefði líka verið talað mikið um lestur og hvernig börn læra að lesa sér til gagns og gamans. Það væri grunnurinn að öllu og á hennar borði hefði verið lagt til að auka íslenskukennsluna á kostnað einhvers annars.
Séu að gera of mikið
Hún segir að í skólanum sé verið að gera alls konar hluti, það sé lýðræðisvika og hrekkjavökuvika og það sé búið að flækja starfið töluvert. Hún segir ákall frá kennurum um að fá meiri tíma í íslensku og stærðfræði.
„Það var smá ákall, á mínu borði, um að gera færri hluti betur,“ segir Björg og að þar sé verið að tala um grundvallaratriði eins og íslensku, stærðfræði og lestur og að geta fært rök fyrir sínu máli.
Björg segir námsgögn einnig hafa verið til mikillar umræðu og hávært ákall á fundinum eftir almennilegu námsefni.
„Það var verið að tala um Málræktarbókina, sem er ein af helstu kennslubókunum í íslensku, en hún er rúmlega fertug,“ segir Björg og spyr hvernig hún eigi að keppa við afþreyingarefnið sem börnum stendur til boða í dag.
„Það er ómögulegt.“
Gera ekkert ein
Hún segir borgina ekki leysa þetta eina. Inga Sæland, mennta- og barnamálaráðherra, hafi tilkynnt á árinu um að leggja rúmar 400 milljónir í námsgagnaframleiðslu og þau fagni því.
„Þarna þarf samtal við ríkið,“ segir Björg og að þau beri ábyrgð á námsgagnaframleiðslu.
Hún segir kennara hafa gripið þennan bolta og það þurfi sérstakt samtal um þessi námsgögn og hvernig þau eigi að halda í við þróun í samfélaginu.
Björg segir niðurstöðu fundarins verða einn grunn sóknaráætlunar í menntamálum sem meirihlutinn vinnur nú að.