Rúta hefur setið föst í aur á Kjalvegi frá í gær. Hálendisvegir eru margir blautir eftir vætutíð síðustu daga.
Vegagerðin hefur bannað allan akstur yfir Kjöl frá Hveravöllum og að Kerlingarfjallavegi. Þar situr hópferðabíll fastur með framendann ofan í forarpytti og hefur ekki haggast síðan síðdegis í gær.
Það tókst ekki að draga rútuna burt með hálendisjeppum og öðrum stærri bílum í gær en Vegagerðin hefur nú komið stórvirkum vinnuvélum á staðinn. Þeir benda fólki sem ætlar þar um að fylgjast með upplýsingum á umferðin.is, sem verði uppfærðar um leið og leiðin verður opnuð.
Enn mjög blautt yfir hálendið austan til
Vegurinn utan þessa stutta kafla í ágætis standi, að sögn Vegagerðarinnar, þannig að allt kapp verður lagt á að draga rútuna burt og laga veginn, svo hægt verið að hleypa umferð yfir miðhálendið aftur.
Vegurinn um Sprengisand hefur ekki verið opnaður og erfitt að segja til um hvenær verður fært þar yfir. Verkstjóri hjá Vegagerðinni segir hálendið mjög blautt austanlands en verði sæmilega þurrt á næstunni sé hægt að huga að opnun fleiri hálendisvega.
