Aldrei áður hafa tónleikar á Sólheimum í Grímsnesi verið jafnvel sóttir og í sumar enda Sólheimakirkja yfirfull á tónleikunum og margir hafa þurft að hverfa frá eða hlusta fyrir utan kirkjuna vegna plássleysis.
Tónleikarnir, sem fara alltaf fram á laugardögum klukkan 14:00 í Sólheimakirkju, eru hluti af Menningarveislu Sólheima. Kirkjan fylltist strax hjá síðasta gesti og þurftu margir frá að hverfa eða standa úti og hlusta en það var Helgi Björnsson með þeim Jónasi Þór orgelleikara og Matthíasi, sem spilaði á gítar og fiðlu.
Helgi fékk gesti til að syngja með sér og stemningin á tónleikunum var eins og best getur orðið.
„Heyrðu, hann Helgi er svakalega skemmtilegur, já, já, hann og amen með það, það er amen, já alveg stuð og uppi er Guð,” segir Reynir Pétur Ingvarsson, íbúi á Sólheimum.
Helgi, varstu ekki ánægður?
„Þetta var yndislega skemmtilegt og svo frábært að vera með fólkinu hérna á Sólheimum. Mig langar að fá að koma hérna á hverju einasta ári,” segir Helgi.
Eftir að tónleikunum lauk var Reynir Pétur mættur við Kaffihúsið Grænu könnuna með munnhörpuna sína.
„Við erum bara auðmjúk gagnvart aðsókninni og móttökunum. Þetta er allt svo afslappað og þetta er svo eðlilegt og það er svo góð stemming,” segir Sigurjón Örn Þórsson, stjórnarformaður Sólheima.
Það er ekki allt búið, það eru nokkrir tónleikar eftir en ókeypis er inn á þá alla.
„Við klárum með Kristjáni Jóhanns 15. ágúst og svo eru nöfn eftir að koma eins og Kristmundur Axel, sem er um næstu helgi. Nei, nei, þetta er langt frá því búið, við erum hálfnuð,” segir Sigurjón Örn.
Um verslunarmannahelgina mun Örn Árnason sjá um að skemmta í Sólheimakirkju þar sem Jónas Þórir verður undirleikari.
Þetta er að gefa ykkur mikið, maður sér það?
„Já, bæði í hjartastað og svo náttúrlega skilja gestir eftir hér í kaffihúsinu eitthvað til þess að vinna úr til að halda áfram að auka samfélagið,” segir Sigurjón alsæll.
