Í nýju meirihlutasamkomulagi stjórnarflokkanna á Akureyri var kveðið á um að Berglind Ósk Guðmundsdóttir, oddviti Sjálfstæðisflokksins, yrði bæjarstjóri, fyrst kjörinna fulltrúa á Akureyri í 16 ár. Það þýðir að Ásthildur Sturludóttir lætur af störfum og það strax í lok næstu viku. Í samtali við fréttastofu í apríl sagði Ásthildur að hún hefði hug á að vera áfram bæjarstjóri ef krafta hennar væri óskað.
„Ég get ekki sagt að þetta hafi komið mér mjög mikið á óvart. Það er ekkert launungarmál að ég hefði alveg viljað vera lengur,“ sagði Ásthildur
Upphaflega voru það L-listinn, Framsóknarflokkurinn og Samfylkingin sem réðu Ásthildi til starfa árið 2018 og framlengdu síðan L-listinn, Miðflokkur og Sjálfstæðisflokkur ráðningu hennar árið 2022.
Þetta samstarf hefur bara gengið óaðfinnanlega. Svo kemur auðvitað nýtt fólk og það er með nýjar áherslur og nýjar hugmyndir og það er kannski ekki sama þó það sé sami stjórnmálaflokkur - en þú veist, það hefur allt sinn tíma.
Nátengd Sjálfstæðisflokknum
Ásthildur hefur lengi verið nátengd Sjálfstæðisflokknum, en faðir hennar var Sturla Böðvarsson ráðherra og systir hennar er Sigríður Erla Sturludóttir, fyrrum starfsmaður þingflokks Sjálfstæðisflokksins. Aðspurð kannast Ásthildur ekki við einhverja óeiningu innan flokksins yfir ákvörðun Sjálfstæðismanna á Akureyri að skipta um bæjarstjóra.
„Ég þekki það ekki. Það er náttúrlega bara innan félagsins hér og þeirra einstaklinga sem eru í frontinum þar, þú verður bara að spyrja þau að því,“ segir Ásthildur.
Langur ferill í sveitarstjórnarmálum
Ásthildur var bæjarstjóri í Vesturbyggð áður en hún settist í stólinn á Akureyri. Hún ólst upp á bæjarskrifstofum í kringum föður sinn sem var sveitarstjóri og síðar bæjarstjóri í Stykkishólmi frá 1974-1991. Hún segir það alls ekki níu til fimm vinnu að vera bæjarstjóri, það sé frekar lífsstíll.
„Ég er bara rosalega glöð með þessa niðurstöðu og ég hlakka bara til að vera meira með fjölskyldunni minni. Þetta eru búin að vera stórkostleg ár, ég hef unnið með frábæru fólki - það er frábært starfsfólk hérna hjá Akureyrarbæ.“
Í kringum alþingiskosningarnar árið 2024 töldu margir að Ásthildur myndi gefa kost á sér á lista Sjálfstæðisflokksins í Norðausturkjördæmi en slíkt kom aldrei til greina að hennar mati:
„Ég allavega hugsaði það ekki neitt sérstaklega alvarlega, get ég sagt. Ég er bara svolítið þannig að ég er trygg og trú mínum störfum þegar ég tek eitthvað að mér þá fer ég bara í það og ég vil klára þau verkefni.“
Óákveðin með framhaldið
Ásthildur hefur ekki ákveðið hvað hún gerir næst en neitar þó ekki að einhverjir hafi þegar sett sig í samband við sig:
Vissulega hafa margir komið að máli við mig og kannað stöðuna hvort ég sé tilbúin að halda áfram í einhverjum góðum störfum. Ef þetta er eitthvað mjög spennandi þá velti ég því alveg fyrir mér.
