„Þetta er í skoðun og það verður bara að hafa sinn gang innan skólans og með þeim sem málið varðar,“ sagði Hjördís Rut Sigurjónsdóttir, verkefnastjóri samskipta hjá skóla- og frístundasviði Reykjavíkurborgar, í samtali við Vísi síðdegis í dag.
Málið sé í ákveðnu ferli innan mannauðsþjónustu borgarinnar og hún geti ekki rætt stöðuna nánar í dag. Þá vildi hún ekki veita upplýsingar um það hvort umræddir starfsmenn væru komnir í leyfi.
En hvað átti sér stað innan veggja skólans þennan afdrifaríka þriðjudag í nóvember og hvernig endaði mannauðsmálið á forsíðum fréttamiðla? Hér er það sem liggur fyrir á þessu stigi málsins.
Málið rætt á kaffistofunni
Umrætt atvik er sagt hafa átt sér stað á skólatíma síðasta þriðjudag þegar athæfi tveggja starfsmanna inni á einni skrifstofu skólans vakti athygli forvitinna unglinga á ganginum fyrir utan.
Nemendur í áttunda til tíunda bekk sækja Hagaskóla og töldu vitni fljótlega ljóst hvað væri þarna að eiga sér stað. Í kjölfarið fóru á flug óstaðfestar sögusagnir um að tveir starfsmenn hefðu átt samræði í húsakynnum skólans.
Á miðvikudag ræðir skólastjóri við aðra starfsmenn um atvikið á kaffistofu þeirra og bendir þeim á að beina fyrirspurnum til skólastjórnenda.
Á miðvikudagskvöld spyrst Vísir fyrir um málið. Skólastjóri vildi þá ekki ræða það í samtali við fréttamann og benti á samskiptafulltrúa skóla- og frístundasviðs Reykjavíkurborgar.
Sú sendi fréttastofu í kjölfarið svar þar sem því var haldið fram að tveir starfsmenn sem töldu sig vera í einrúmi hefðu sést „í innilegum faðmlögum í gegnum sandblásið gler.“
Málið var sagt til skoðunar í samráði við mannauðsskrifstofu skóla- og frístundasviðs og að það yrði unnið samkvæmt „viðeigandi verkferlum“. Sami fulltrúi borgarinnar svaraði ekki frekari spurningum um atvikið og vildi ekki kannast við að kynferðislegar athafnir hefðu þarna átt sér stað.
Svar borgarinnar á miðvikudagskvöld
„Tveir starfsmenn, sem töldu sig vera í einrúmi, sáust í innilegum faðmlögum í gegnum sandblásið gler. Skólastjórnendur hafa rætt við hlutaðeigandi og málið er til skoðunar í samráði við mannauðsskrifstofu skóla- og frístundasviðs. Málið verður unnið áfram samkvæmt viðeigandi verkferlum.
Í kjölfarið var lögð áhersla á að starfsfólk væri sýnilegt og aðgengilegt á göngum skólans svo nemendur gætu leitað til þess ef þeir hefðu spurningar eða vildu ræða málið.“
Fljótlega sama kvöld sendir Sigríður, starfandi skólastjóri Hagaskóla, út tölvupóst til foreldra um málið.
Pósturinn var að hluta til beint afrit af fyrra svari fulltrúa borgarinnar en einu lykilatriði hafði þar verið breytt: Ekki var lengur talað um innileg faðmlög heldur kossa. Einnig staðhæfir Sigríður að upphaflega hafi ekki staðið til að upplýsa foreldra um atvikið en stjórnendur nú talið rétt að gera grein fyrir því í ljósi fyrirspurna fjölmiðla.
Fyrsti póstur skólastjórans til foreldra
„Kæru foreldrar
Tveir starfsmenn skólans, sem töldu sig vera í einrúmi, sáust kyssast í gegnum sandblásið gler í gær.
Skólastjórnendur hafa rætt við hlutaðeigandi og málið er til skoðunar í samráði við mannauðsskrifstofu skóla- og frístundasviðs. Í kjölfarið var lögð áhersla á að starfsfólk væri sýnilegt á göngum skólans svo nemendur gætu leitað til þess ef þeir hefðu spurningar eða vildu ræða málið.
Ekki var talið tilefni til að senda sérstakar upplýsingar um málið til allra foreldra. Þar sem fjölmiðlar hafa verið að spyrjast fyrir um málið teljum við þó rétt að gera stuttlega grein fyrir því og viðbrögðum skólans.
Með kærri kveðju,
Sigga Nanna.“
Eftir að þessi tölvupóstur birtist í innhólfi fleiri hundruð forráðamanna birtust fyrstu fréttir fjölmiðla um málið. Umfjöllunin vakti mikla athygli en ekki þögnuðu sögusagnir um að eitthvað meira en saklausir kossar hefðu mögulega átt sér stað bak við sandblásna glerið á skrifstofunni þennan þriðjudaginn.
Á sama tíma mátti sjá fólk furða sig á því á samfélagsmiðlum að íslenskum unglingum væri ekki lengur treyst til þess að komast óskaddaðir frá því að sjá tvo fullorðna einstaklinga kyssast.
Um hálfum sólarhring eftir að fjallað var um mál starfsmannanna kom ljósmynd fram á sjónarsviðið sem er sögð hafa verið tekin af nemanda fyrir utan umrædda skrifstofu. Líkt og lýst hefur verið í fyrri fréttum sjást þar tveir einstaklingar bak við sandblásið gler, einn með tagl í hári og greinilega sitjandi ofan á hinum.
Fyrir aftan fólkið skín skær birta í gegnum gluggana á móti og við hlið þeirra sést spegilmynd minnst tveggja unglinga sem fylgjast með athæfinu á ganginum fyrir utan.
Taldi ástæðu til að senda annan póst
Eftir að fjallað var um ljósmyndina sendi skólastjóri Hagaskóla annan tölvupóst til foreldra þar sem áréttað var að skólinn liti mál tveggja starfsmanna skólans alvarlegum augum í ljósi nýrra upplýsinga sem skólastjórnendum Hagaskóla hefðu borist, svo sem mynda.
„Skólinn harmar að þetta atvik hafi átt sér stað og mun vinna að úrlausn þessa viðkvæma máls samkvæmt verkferlum. Eðli málsins samkvæmt verður ekki farið ofan í málsatvik heldur verður málið unnið áfram með hlutaðeigandi og mannauðsþjónustu skóla- og frístundasviðs. Boðið verður upp á samtal fyrir þau börn sem urðu vitni að atvikinu ef þau eða foreldrar þeirra telja þörf á og geta þau þá haft samband við mig,“ segir í póstinum til foreldra sem Sigríður skólastjóri undirritar.
RÚV greinir frá því að börn í Hagaskóla hafi verið beðin um að tala ekki um ástaratlot starfsmannanna tveggja og hefur eftir foreldrum nemenda við skólann.
„Ég veit ekki nákvæmlega hvaða orðaskipti fóru fram á milli starfsmanna og barna þegar atvikið kom upp. Málið er í vinnslu innan skólans og í samstarfi við mannauðsskrifstofu skóla- og frístundasviðs og ég mun ekki tjá mig frekar um það við fjölmiðla,“ sagði Sigríður í svari við fyrirspurn RÚV en ekki náðist í hana við vinnslu þessarar fréttar.
Hún svaraði því ekki þegar fréttamaður RÚV spurði hvort starfsmennirnir yrðu áfram við störf á meðan málið væri til skoðunar.
Safna fyrir góðum málefnum
Óhætt er að segja að tímasetning málsins sé sérstaklega óheppileg fyrir nemendur og starfsfólk Hagaskóla en í dag fór fram árlegi góðgerðardagurinn Gott mál þar sem nemendur skólans fá frí frá kennslu og taka upp á hinu ýmsu til þess að safna fé fyrir góð málefni.
Þetta árið ákváðu nemendur að safna fyrir Krabbameinsfélagið og börn og ungmenni í hinu stríðshrjáða Suður-Súdan með því að selja veitingar og bjóða upp á fjölbreytta afþreyingu í stofum skólans.
Fjöldi forráðamanna og annarra gesta sótti skólann heim í dag vegna þessa en í fyrra söfnuðust 3,6 milljónir króna fyrir Kvennaathvarfið og ungmennahús í Afganistan.
Ljóst er að skólastjórnendur hefðu fremur óskað þess að þetta væri meginástæðan fyrir því að Hagaskóli rataði í fréttir nú þegar dagarnir eru farnir að styttast en ekki nóg til þess að komast hjá því að lýsa upp einstaka skrifstofur.
„Það var svo mikið að gera í Hagaskóla í dag,“ segir Hjördís, samskiptafulltrúi skóla- og frístundasviðs borgarinnar. „Þau voru með Gott mál og það væri óskandi að fjölmiðlar hefðu jafn mikinn áhuga á því en það er eins og það er.“
„Tveir starfsmenn, sem töldu sig vera í einrúmi, sáust í innilegum faðmlögum í gegnum sandblásið gler. Skólastjórnendur hafa rætt við hlutaðeigandi og málið er til skoðunar í samráði við mannauðsskrifstofu skóla- og frístundasviðs. Málið verður unnið áfram samkvæmt viðeigandi verkferlum.
Í kjölfarið var lögð áhersla á að starfsfólk væri sýnilegt og aðgengilegt á göngum skólans svo nemendur gætu leitað til þess ef þeir hefðu spurningar eða vildu ræða málið.“
„Kæru foreldrar
Tveir starfsmenn skólans, sem töldu sig vera í einrúmi, sáust kyssast í gegnum sandblásið gler í gær.
Skólastjórnendur hafa rætt við hlutaðeigandi og málið er til skoðunar í samráði við mannauðsskrifstofu skóla- og frístundasviðs. Í kjölfarið var lögð áhersla á að starfsfólk væri sýnilegt á göngum skólans svo nemendur gætu leitað til þess ef þeir hefðu spurningar eða vildu ræða málið.
Ekki var talið tilefni til að senda sérstakar upplýsingar um málið til allra foreldra. Þar sem fjölmiðlar hafa verið að spyrjast fyrir um málið teljum við þó rétt að gera stuttlega grein fyrir því og viðbrögðum skólans.
Með kærri kveðju,
Sigga Nanna.“