Eins og Vísir greindi frá í vikunni hefur héraðssaksóknari nú ákært tvo menn fyrir kynferðislegar athafnir þeirra í barnalaug Laugardalslaugar.
Alls ekki algengt að svona mál komi upp
Atvikið gerðist sumarið 2025, nánar tiltekið 12. júní það ár. Tveir karlmenn voru að verki en ákært er fyrir brot á 209. grein almennra hegningarlaga en þar segir að hver sem með lostugu athæfi særi blygðunarsemi manna eða er til opinbers hneykslis skuli sæta fangelsi allt að fjórum árum en allt að sex mánuðum eða sektum ef brot er smávægilegt.
Steinþór er spurður hvort svona mál komi reglulega inn á borð hjá menningar- og íþróttasviði en hann segir það ekki svo.
„Nei, og þetta kom ekkert inn á okkar borð. Athæfið var stöðvað af starfsmanni og var strax kært. Nú er þetta komið fyrir dóm og þá farið í loftið. Mér skilst að fámenni hafi verið í lauginni en starfsmaður greip inn í og málið var kært beint til lögreglu. Það var ekkert fjallað um þetta þá og fréttin kemur okkur því eins mikið á óvart og öðrum,“ segir Steinþór.
Drulluskítug og skítköld krakkalaug
Nýverið ritaði Ásmundur Helgason útgefandi status á Facebook-síðu sína þar sem hann kvartaði sáran undan bágu ásigkomulagi Laugardalslaugar. Ásmundur er ómyrkur í máli og segir laugina nánast óboðlega gestum: Engin armbönd, gestir hvattir til að deila skápum, krakkalaugin skítköld, drulluskítug og stútfull af rusli.
„Við flæktumst í hárklessum og syntum í gegnum alls konar plástraplastdrasl, mæli ekki með að fara í kaf með sundgleraugum, sjón er sögu ríkari.“
Og áfram halda umkvartanir Ásmundar. Steinþór segist kannast við skrifin, þau hafi verið send honum. Og hann reynir ekki að fegra stöðuna, það sé ekki gott ástandið. Fyrir því eru margvíslegar ástæður. Til hefur staðið að taka allt útisvæðið í gegn en þetta tengist jafnframt bágu ástandi hinnar forfrægu stúku.
Myglan breytti forgangsröðinni
„Það voru settir á fót rýnihópar, gestir laugarinnar gátu komið á framfæri sínum athugasemdum, 1500 hugmyndir bárust og til stóð að fjórir milljarðar færu í endurgerð. Svo gerist það að í ljós kemur að leikskólar og grunnskólar eru meira og minna myglaðir og forgangsröðun breytist.“
Þessu tengist svo að stúkan er talin hættuleg sem þýðir að loka þarf öllum heitum pottum og sjópottinum auk þess sem gufan hefur verið undir stúkunni. „Öll þessi þjónusta dettur út. Hvað á að koma í staðinn fyrir stúkuna? Á að setja upp bráðabirgðapotta annars staðar? Allt tekur sinn tíma. En fyrst og fremst er þetta spurning um fjármagn. Þetta er drottning allra lauga og vinsæl sem slík.“
Steinþór Einarsson segir þetta stuttu útgáfuna af hörmungarsögu Laugardalslaugar.