Þetta er í 25. skipti sem samtökin heiðra með þessum hætti einstaklinga eða félagasamtök sem hafa unnið óeigingjarnt starf til að bæta líf barna og verja réttindi þeirra hér á landi.
Arnrúna María Magnúsdóttir leikskólakennari, stofnandi Samtalsins fræðsla ekki hræðsla og höfundur Lausnahringsins hlaut viðurkenningu. Hún hefur starfað með börnum frá árinu 1992 og leggur áherslu á að forvarnir hefjist snemma í lífi ungra barna.
Þá fékk Bergið headspace einnig viðurkenningu en samtökin veita ungu fólki á aldrinum tólf til 25 ára ókeypis, faglega og aðgengilega ráðgjöf. Þar þarf hvorki tilvísun né greiningu til að fá stuðning.
„Fræðsla, samskipti og samkennd skipta meira máli nú en nokkru sinni fyrr. Forvarnir, ráðgjöf og stuðningur við þolendur eru mikilvæg skref í baráttunni við ofbeldi gegn börnum, og þar höfum við hjá Barnaheillum lagt helstu áherslur í starfi okkar hér innanlands síðustu ár,“ sagði Þorbjörg Helga Þorgilsdóttir, formaður Barnaheilla, á viðurkenningarathöfninni í morgun.