Slökkvilið Fjallabyggðar fékk tilkynningu um mikinn eld fyrir utan íbúðarhús á Siglufirði í gærdag en enginn var heima í húsinu þegar eldurinn kom upp. Þegar slökkviliðið mætti á vettvang hafði eldurinn náð að læsa sér í klæðningu, verönd og svalir. Rúður höfðu gefið eftir vegna hita, samkvæmt því sem fram kemur á Facebook-síðu Slökkviliðs Fjallabyggðar.
Mikið viðbragð var vegna eldsins og slökkviliðsmenn frá Siglufirði og Ólafsfirði tóku þátt í aðgerðum. Örugglega gekk að koma í veg fyrir frekari útbreiðslu eldsins en nokkurn tíma tók að tryggja að eldurinn bærist ekki í þak hússins.
Eldsupptök eru til rannsóknar hjá tæknideild lögreglunnar á Norðurlandi eystra.
