Hannes Valle Þorsteinsson, sem ákærður var fyrir kynferðisbrot gegn barni á leikskólanum Múlaborg í Reykjavík, var sakfelldur í Héraðsdómi Reykjavíkur í gær.
Hann var dæmdur í þriggja ára fangelsi.
Hann var ákærður fyrir að hafa tvisvar sinnum brotið kynferðislega gegn stúlku á leikskólanum á síðasta ári.
Auk fangelsisvistar er Hannesi gert að greiða 2,5 milljónir, auk vaxta, í skaðabætur.
Þriggja ára fangelsi
Hannes var dæmdur í þriggja ára fangelsi fyrir að hafa, í ágúst 2025, dregið niður buxur stúlku inni á salernisbás, tekið hana upp þannig að hún sneri baki í hann, sett getnaðarlim sinn á milli læra hennar og viðhaft samfarahreyfingar.
Hann játaði þau brot sín við skýrslutöku hjá lögreglu.
Hannes var einnig ákærður fyrir að nauðgun og kynferðisbrot gegn stúlkunni með því að hafa brotið gegn henni þegar hún var sofandi í hvíldarherbergi leikskólans.
Hann var sýknaður af þeirri ákæru.
Í dómnum eru gerðar athugasemdir við yfirheyrslur lögreglu varðandi þann ákærulið.
„Við skýrslutökuna er afar hart gengið að ákærða, framburður hans kerfisbundið
dreginn í efa og hann ítrekað sakaður um ósannindi. Þegar játningin kemur hefur verið
dregin upp ákveðin mynd sem ákærði virðist samþykkja undir þrýstingi lögreglu.“
Þriðja ákæran var gefin út á hendur Hannesi í apríl og hún sameinuð málinu.
Í þeirri ákæru var Hannesi gefið að sök að hafa í nokkur skipti bitið stúlkuna í rassinn í leikskólanum.
Hann var sýknaður af þeirri ákæru þar sem ekki var talið að háttsemi hans hafi verið kynferðislegs eðlis.
Þinghald í málinu var lokað.
Hafði starfað á leikskólanum í tæp tvö ár
Í dómnum kemur fram að samkvæmt greindarprófi sé Hannes með greind á tornæmisstigi.
Samkvæmt matsgerðum tveggja geðlækna er hann þó ekki haldinn geðsjúkdómi og því telst hann sakhæfur.
Hannes hafði starfað á leikskólanum í tæplega tvö ár.
Hann var úrskurðaður í gæsluvarðhald í ágúst 2025, eftir að foreldrar barnsins höfðu samband við lögreglu.
Mál 17 barna tekin til skoðunar hjá lögreglu
Mál sautján barna á leikskólanum voru tekin til skoðunar hjá lögreglu eftir handtökuna. Foreldrar þrettán þessara barna kærðu Hannes fyrir meint brot gegn börnum sínum.
Rannsókn tíu þeirra var hætt en þrjú voru send til héraðssaksóknara.
Ákæra var gefin út í þessu eina máli.
