Tuttugu þúsund færri Bandaríkjamenn komu til Íslands í júní en í sama mánuði í fyrra samkvæmt gögnum Ferðamálastofu. Það er um 21% samdráttur milli ára.
„Það er erfitt að fullyrða að það sé að verða stór samdráttur í ferðum Bandaríkjamanna almennt út frá tölum eins mánaðar en það gefur þó vísbendingu um að það sé að slakna heldur á áhuga Bandaríkjamanna á Íslandi sem áfangastað,“ segir Jóhannes Þór Skúlason, framkvæmdastjóri Samtaka ferðaþjónustunnar.
Hann segir að ýmsar ástæður geti verið fyrir færri komum í júní frá því í fyrra. Til dæmis geti verið að fleiri hafi ákveðið að ferðast til Íslands í ágúst vegna sólmyrkvans. Þá gætu heimsmeistaramótið í fótbolta og efnahagsástandið í Bandaríkjunum spilað inn í.
Almennt hefur dregið úr ferðalögum Bandaríkjamanna. Samkvæmt nýlegri könnun Deloitte ætluðu 45% Bandaríkjamanna að ferðast í sumar en hlutfallið hefur ekki verið lægra frá 2020.
Samkvæmt Independent hafa ferðalög að sumarlagi dregist saman um 20% hjá Bandaríkjamönnum á síðustu þremur árum.
Bandaríkjamenn verðmætastir
Bandaríkjamenn eru stærsta þjóðin sem sækir Ísland heim og sú verðmætasta. Jóhannes Þór segir að gróflega reiknað geti Ísland verið að fara á mis við 5,5 milljarða í gjaldeyristekjur vegna fækkunarinnar í júní miðað við sama mánuð í fyrra.
Þetta geti haft í för með sér á annan milljarð sem ratar ekki í ríkissjóð í formi skatttekna.
„Þetta er fljótt að hafa áhrif á bæði ferðaþjónustuna og efnahagslífið í heild ef þetta heldur svona áfram. Við skulum nú vona að það geri það ekki.“
Jóhannes Þór fagnar því að ráðist sé í neytendamarkaðssetningu til að bregðast við minnkandi áhuga á landinu, til dæmis meðal Bandaríkjamanna.
„Við vonumst til þess að það nái að vinna gegn þessari töpuðu samkeppnishæfni sem við höfum séð á undanförnum mánuðum og árum,“ segir hann.
