Bjarni er einn reynslumesti vallarstjóri landsins. Hann er með M.Sc. gráðu í sportserves technology frá Cranfield University á Englandi og hann gefur reglulega út myndbönd á Facebook-síðu Golfklúbbs Mosfellsbæjar þar sem hann fer yfir stöðu mála.
„Þetta er nákvæmlega ástæðan fyrir því að við viljum ekki að fólk sé að fara inn á vellina okkar núna þegar frostið er að fara úr jarðveginum. Yfirborðið getur verið eins og búðingur og þá lendum við í svona tjóni,“ segir Bjarni.
Að sögn Bjarna eru þetta erfiðir tímar. Ofsakláði hefur kitlað margan kylfinginn, einkum þegar veður er eins og það er núna, sólin skín og sannkallað golfæði hefur gripið landann.
„Heldur betur. Masterinn er búinn, veður gott og maður vill rífa í prikin,“ segir Bjarni hress í bragði.
Yfirborðið eins og búðingur sem breytist í drullu
Hann segir þetta bara á sumum stöðum og þetta gerist nánast á hverju vori. „Það er óþolandi þegar fólk labbar inn á þessi svæði, það getur farið í taugarnar á manni. Ef frostlagið, sem er undir yfirborðinu, er „solid“ þá minnir það á steypta pönnu sem er undir og jarðvegurinn sem er fyrir ofan er að þiðna, þá verður vatnssósa svæði og við ágang breytist það allt í drullu.“
Bjarni segir þetta mismunandi milli valla og staðsetningar þeirra. Bakkakot fékk til að mynda yfir sig snjó þegar frostakaflinn gekk yfir en Hlíðarvöllur ekki. Snjórinn myndar vörn gegn þessu ástandi. Völlurinn er harðlokaður nú sem stendur en það horfir til bóta.
„Þetta verður farið eftir helgi. Þá byrjum við að þjappa grínunum niður aftur.“
Bjarni segist hafa verið í þessu lengi og hann muni vel eftir því þegar vetrargolf var, pinni út á braut og svo var spilað. „Þetta var í lagi þegar ágangurinn var minni en ef ég segði að það væri opið myndu býsna margir mæta og þá færi þetta að verða vesen.“
Reykjavík mætti líta í eigin barm
Bjarni segir þetta þannig lúxusvandamál sem megi rekja til þeirrar golfsprengju sem hefur verið á Íslandi undanfarin ár. „Það vantar fleiri golfvelli. Það er frábært ef menn hreyfa sig og golf hefur jákvæð lýðheilsuáhrif. En ef við ætlum að anna þessu þarf að opna fleiri teigtíma. Við þurfum ekki bara keppnisvelli heldur fleiri níu holu golfvelli á borð við Setberg og Bakkakot.“
Bjarni segir, í ljósi þess að nú séu að nálgast kosningar, að Reykvíkingar megi líta í eigin barm. Það sé alltof lítið af völlum í Reykjavík og þá fari menn í nágrannasveitarfélögin. Menn séu vitaskuld velkomnir en nú sé yfirflæði og margir á biðlista. Reykjavík þurfi að horfa í eigin barm og skoða hvort þeir þurfi ekki að bjóða upp á meira úrval.
