Eyjólfur Ármannsson innviðaráðherra segir að ekki sé hægt að tala um niðurskurð á loftbrú. Breytingin sé tímabær kerfisbreyting og eigi að auka fyrirsjáanleika:
„Við erum að búa til betra kerfi. Við erum að tryggja það í fyrsta lagi að allir fái sömu krónutölu af hverjum fluglegg. Allir sem eru núna að kaupa miða undir 17.500 krónur fá hærri prósentu en 40%. Það er meiri hvatning en áður þannig að fólk sé að kaupa sér ódýrari miða.“
Um 600 milljónir króna hafa verið áætlaðar í Loftbrú undanfarin ár. Það hefur ekki dugað og muninum hefur verið mætt með aukafjárveitingum. Árið 2025 fóru útgjöld vegna Loftbrúar 140 milljónir fram úr áætlun.
„Nú ætlum við að tryggja Loftbrúna allt árið. Það er ekki fyrirsjáanlegt að við komumst í fjárauka í ár og ekki á næsta ári heldur,“ segir Eyjólfur.
Íbúar á landsbyggðinni hafa getað nýtt Loftbrú við kaup á flugi innanlands frá 2020. Hver og einn hefur átt rétt á sex flugleggjum á ári sem ríkið niðurgreiddi um 40%. Innviðaráðuneytið kynnti í dag breytingar á þessu fyrirkomulagi. Frá og með næstu áramótum verður föst krónutala niðurgreidd af hverju fargjaldi, 7.000 krónur fyrir fluglegg eða 14.000 fyrir ferð fram og til baka.
Skilur gremju fólks en segir að hægt sé að kaupa ódýra flugmiða
Þingmenn stjórnarandstöðu hafa látið óánægju sína með breytinguna í ljós á Facebook. Meðal annars Ingibjörg Isaksen, þingmaður Framsóknarflokksins. „Ríkisstjórnin ætlar að breyta Loftbrúnni þannig að meðalafsláttur lækkar um 24% miðað við síðasta ár. Enn ein ákvörðunin sem eykur kostnað fólks á landsbyggðinni. Ráðherra hvetur fólk til að bóka flug með lengri fyrirvara. En veikindi, fjölskylduaðstæður og óvænt erindi gera ekki alltaf boð á undan sér. Loftbrúin var ekki hugsuð sem tímabundinn afsláttarleikur. Hún var hugsuð til að jafna tækifæri fólks óháð búsetu. Það markmið á enn að vera leiðarljósið.“
Eyjólfur segist skilja gremju fólks en bendir á að með góðum fyrirvara sé hægt að bóka ódýra flugmiða þannig að 7000 krónur verði meira en 40% af miðaverðinu.
„Já ég hef alveg skilning á því. Það sem við höfum verið að sjá að ódýrasta fargjaldið sé um 23.000 krónur milli Akureyrar og Reykjavíkur fram og til baka ef bókað er með tveggja til fjögurra vikna fyrirvara. Þetta er kerfisbreyting og við erum ekki að skera niður fjárveitingar til þessa málaflokks.“
„Þetta er kornið sem fyllir mælinn“
Berglind Ósk Guðmundsdóttir, bæjarstjóri á Akureyri, segir að það sé ekki lengur hægt að tala um neikvæða upplifun landsbyggðarfólks heldur bara staðreyndir. „Ég verð að segja að mér líst ekkert sérstaklega vel á þetta. Þetta kemur allt heim og saman við kílómetragjaldið og það á að fækka þingmönnum á landsbyggðinni. Þetta er bara kornið sem fyllir mælinn og við getum ekki sætt okkur við að þetta sé orðinn hlutur. “
Berglind segir að ómögulegt sé að finna eins ódýrt flug og ráðuneytið bendir á.
„Ég fór nú bara beint inn á vefinn hjá Icelandair og skoðaði flug á milli Akureyrar og Reykjavíkur og í fyrirsjáanlegri framtíð var það nú ekki þannig að maður gæti fengið flug og þessi afsláttur myndi duga fyrir því sem var. Þetta er bara hrein og klár skerðing fyrir okkur landsbyggðarfólkið.“
Hjalti Þór Vignisson, bæjarstjóri á Höfn í Hornafirði, segir að túlka megi aðgerðir ríkisstjórnarinnar sem hálfgerða aðför að landsbyggðinni.
„Við erum bara að horfa framan í það núna að við erum að fá minni stuðning við loftbrú og síðan er verið að setja veggjöld hjá okkur sem tíðkast nánast hvergi annar staðar á landinu. Það er verið að opna nýja vegi á höfuðborgarsvæðinu án veggjalda, þannig að hvernig getur maður túlkað þetta öðruvísi?“
