„Niðurstaðan getur orðið að Orkuveitan eigi áfram allt fyrirtækið. Það er auðvitað ekkert útilokuð niðurstaða [...] Við ætlum ekki að selja félagið ódýrt.“
Þetta segir Sævar Freyr Þráinsson forstjóri Orkuveitunnar.
Stjórn Orkuveitunnar samþykkti í gær umboð vegna mögulegrar einkavæðingar Ljósleiðarans. Fulltrúi Samfylkingarinnar í stjórninni greiddi atkvæði gegn skrefinu og telur að Ljósleiðarinn þurfi að vera í opinberri eigu.
Umboð háð samþykki sveitarfélaga
Fyrirtækið er að fullu í eigu Orkuveitu Reykjavíkur. Umboð til mögulegrar einkavæðingar er háð því að eigendur samþykki það. Þeir eru Reykjavíkurborg, Akranes og Borgarbyggð.
Séu sveitarfélögin samþykk verður það í höndum forstjóra Orkuveitunnar að ákveða hvort fyrirtækið verður selt.
Það er þó möguleiki að eignarhald fyrirtækisins breytist ekkert.
„En það er líka möguleiki að nýir fjárfestar eignist félagið að hluta eða í heild. Sömuleiðis erum við að sækjast eftir umboði til þess að eiga möguleika á því að skrá félagið á markað,“ segir Sævar Freyr.
Hann segir markmiðið að hámarka verðmæti Ljósleiðarans.
„Markmiðið snýst um að efla fyrirtæki í samstarfi við aðra en eiga líka möguleika á að skoða það að selja það í heild sinni.“
Svo jafnvel þótt þú fengir umboð til að selja Ljósleiðarann, þýðir það ekki að það yrði endilega gert ef þú metur aðstæður á markaði sem svo?
„Það er hárrétt,“ segir Sævar Freyr.
Skúli Helgason borgarfulltrúi Samfylkingarinnar situr í stjórn Orkuveitunnar. Hann greiddi atkvæði gegn tillögunni sem var samþykkt í gær.
Skúli segir að möguleg sala gæti reynst afdrifarík. Hann telur að veigamiklu innviðafyrirtæki líkt og Ljósleiðaranum sé betur borgið í opinberri eigu, einkum í ljósi fjölþáttaógna.
„Til dæmis netárásir á opinberar stofnanir, fyrirtæki og almenning er eitthvað sem er orðið daglegur veruleiki í okkar samfélagi. Við þær aðstæður er ennþá mikilvægara að Ljósleiðarinn sé á hinu opinbera forræði,“ segir Skúli.
Hann segir það ekkert leyndarmál að pólitísk stefna meirihlutans í Reykjavík sé að selja Ljósleiðarann.
„Það er ákveðin leiðsögn í þá átt en ég vona sannarlega að menn vandi sig í þessu ferli og horfi til þess að gera það sem er bæði best fyrir Ljósleiðarann, Orkuveituna og fyrir samfélagið okkar.“
Á stjórnarfundinum í gær lagði Skúli fram tillögu um að láta gera óháð verðmat á virði Ljósleiðarans og óháða ytri greiningu á markaðsaðstæðum á fjarskiptamarkaði áður en heimild til að selja hann verður afgreidd.
