Fjórar konur og tveir karlar létust í skotárás í miðborg Kraká í Póllandi í dag. Einn hinna látnu var erlendur ríkisborgari. Þetta kom fram á blaðamannafundi stjórnvalda í kvöld. BBC greinir frá.
Marcin Kierwiński innanríkisráðherra Póllands sagði á fundinum að árásarmaðurinn hafi verið 25 ára og með pólskan ríkisborgararétt.
Kierwiński segir að búið sé að bera kennsl á fjóra af þeim sex sem létust í árásinni og unnið sé að því að bera kennsl á hina tvo. Fjölskyldur þeirra látnu hafi verið upplýstar.
Hann segir að 16 manns hafi særst í árásinni, þar af fimm erlenda ríkisborgara. Tveir þeirra hafi verið útskrifaðir af sjúkrahúsi.
Árásarmaðurinn keyrði inn á aðaltorg borgarinnar og hóf skothríð á fólk sem var þar. Lögregla skaut árásarmanninn en hann var svo fluttur á sjúkrahús.
Innanríkisráðherrann greindi frá því að árásarmaðurinn liggi enn á sjúkrahúsi í alvarlegu ástandi og hafi gengist undir tvær aðgerðir.
Ekkert bendi til þess að fleiri en einn hafi verið að verki.
Verið sé að leita á heimili árásarmannsins. Samkvæmt Kierwiński er ein tilgáta sú að vopnin sem notuð voru í árásinni hafi verið tekin af heimili fjölskyldu hans. Nokkur vopn séu skráð á föður hins grunaða.
Kierwiński hrósaði skjótum viðbrögðum lögreglunnar, en hann segir að lögreglumenn hafi skotið á árásarmanninn þremur mínútum eftir að þeir fengu tilkynningu um árásina. Slökkvilið og sjúkrabílar hafi einnig verið mætt á vettvang eftir þrjár mínútur.
Segir árásarmanninn hafa „mjög róttækar skoðanir“
Kierwiński sagði allt benda til þess að maðurinn hafi sótt innblástur í „öfga-hægri hugmyndafræði“. Árásarmaðurinn virtist hafa „mjög róttækar skoðanir“ og að mörg skotvopn hafi fundist í bílnum sem hann ók. Leit stendur enn yfir af honum.
Hann bætir við að fyrstu athuganir bendi til þess að árásarmaðurinn hafi aðhyllst „öfgaþjóðernissinnuð viðhorf“, en að sögn Kierwińskis þurfi að staðfesta það.
Łukasz Gibała, borgarstjóri Kraká, hefur undirritað tilskipun um að lýsa yfir sorgartímabili í borginni sem stendur yfir til miðvikudags.
Wladyslaw Kosiniak-Kamysz, varnarmálaráðherra Póllands, hefur vísað á bug fréttum þess efnis að árásarmaðurinn hafi verið hermaður í pólska hernum. Hann hvatti fólk til þess að dreifa ekki rangfærslum.
Hann sagði að margir liggi á sjúkrahúsi og berjist þar fyrir lífi sínu, þar á meðal lögreglumaður sem hindraði árásarmanninn í að valda frekara tjóni.
Borgaraþjónusta utanríkisráðuneytisins hvetur Íslendinga í Kraká til að láta aðstandendur vita eða gera grein fyrir sér á samfélagsmiðlum. Fólk er hvatt til þess að hafa samband við neyðarnúmer borgaraþjónustu í síma +354 545-0-112 ef aðstoðar er þörf.
Íslendingum á vettvangi er bent á að virða lokanir og tilmæli yfirvalda og fylgjast með fjölmiðlum á staðnum.
