Kristrún Frostadóttir forsætisráðherra birti mynd af sér á Keflavíkurflugvelli daginn eftir byggðakosningarnar fyrir viku. Með myndinni var Facebook-færsla um úrslit kosninganna. Margir lesendur Kristrúnar tóku til máls í athugasemdum og ýmist tóku undir greiningu forsætisráðherra eða andmæltu. Fáeinir virkir í athugasemdum spurðu Kristrúnu um úrið sem hún bar á myndinni.
Gull, demantar og 1,6 milljónir
Eftir að forvitni um úr forsætisráðherra var vakin fór blaðamaður Morgunblaðsins á stjá og aflaði sér nákvæmra um upplýsinga um tímamæli Kristrúnar. Úrið er úr stáli og 18 karata rauðagulli. Ellefu demantar prýða skífuna til að auðvelda álestur. Úrkeðjan er stálgerð með rauðagulli. Fiðrildalæsing er á keðjunni. Glerið er úr safír, rispast hvorki né speglar. Úrið er af gerðinni Chronomat Automatic 36. Framleiðandinn er svissneska fyrirtækið Breitling. Út úr búð á Íslandi kostar úr forsætisráðherra 1,6 milljónir króna.
Álfheiður og hönd jafnaðarmannsins
Stefán Pálsson sagnfræðingur og frambjóðandi Vinstrisins í borgarstjórnarkosningum gerði að umtalsefni á Facebook hve óþægilegt er að hafa á sér peningaleg verðmæti. „Einhver versta tilfinning sem yfir mig getur komið,” skrifaði Stefán, „er að halda á t.d. peningaumslagi með hárri fjárhæð. Ég er allan tímann á nálum yfir að missa það eða setja á glámbekk. Á sama hátt myndi ég aldrei hafa taugar í að ganga með milljón króna armbandsúr. Svitna raunar bara við tilhugsunina.“
Álfheiður Ingadóttir, fyrrum þingmaður og ráðherra Vinstri grænna, setti merki velþóknunar við færslu Stefáns og bætti við athugasemd: „Einhvern tímann hefði nú hönd jafnaðarmannsins visnað við minna!“
