Jón Magnússon skrifar:

Sjálfstæðisflokkurinn vann afgerandi sigur í sveitarstjórnarkosningunum í gær. Úrslitin í Reykjavík voru kærkomin og ákall kjósenda um að Sjálfstæðisflokkurinn og Miðflokkurinn myndi hægri stjórn í borginni. Það var löngu tímabært.

Um langa hríð hafa andstæðingar Sjálfstæðisflokksins ítrekað flutt fréttir af væntanlegu andláti hans. Nú liggur fyrir, að frásagnir af andláti hans hafa verið stórlega ýktar. 

Sjálfstæðisflokkurinn vinnur sigur um nánast allt land og er með hreinan meirihluta í Kópavogi, Garðabæ, Seltjarnarnesi, Vestmannaeyjum og Árborg svo dæmi séu tekin.

Úrslitin hljóta að vera áhyggjuefni fyrir ríkisstjórnarflokkana sérstaklega Samfylkinguna. Kristrún Frostadóttir beitti sér opinberlega af alefli í baráttunni og gerði hana að sinni og verður nú að sætta sig við mestu ófarir Samfylkingarinnar í sveitarstjórnarkosningum á höfuðborgarsvæðinu frá upphafi.

Að sama skapi hljóta úslitin að vera áhyggjuefni fyrir fraukurnar þrjár sem standa að ríkisstjórninni. Flokkur fólksins hrynur í Reykjavík og samtals ná ríkisstjórnarflokkarnir ekki nema 32% atkvæða í Reykjavík og lægra hlutfall á öllu Reykjavíkursvæðinu nema á Seltjarnarnesi. Úrslitin eru því afhroð fyrir ríkisstjórnina.

Þrátt fyrir afhroð ríkisstjórnarflokkana í kosningunum er Þorgerður Katrín kokhraust að vanda og segir úrslitin ákall um að Viðreisn vinni ekki með Miðflokknum. Raunar þarf verulega heilaleikfimi og skort á því að geta sett hlutina í rökrænt samhengi til að finna þá niðurstöðu út, en Þorgerði er margt til lista lagt. 

Myndi Sjálfstæðisflokkurinn meirihluta með fyrrum hækjum Dags B. Eggertssonar og Samfylkingarinnar, Framsókn og Viðreisn, þá væri það afgerandi mistök.

Frjálslynd hægri stjórn þarf að koma í Reykjavík með samstarfi Miðflokks og Sjálfstæðisflokks. 

Nú er að láta hendur standa fram úr ermum og koma gamla meirihlutanum frá strax og hleypa ferskum vindum og hugmyndum inn í stjórnun borgarinnar.