Óvissa ríkir um áframhaldandi viðveru bandarísks herafla í Eistlandi. Bandarískum hermönnum í landinu hefur fækkað verulega á undanförnum árum.
Eistneskur embættismaður segir viðveru bandarísks herliðs á austurvæng NATO sérstaklega mikilvæga.
Fram kemur í frétt eistneska ríkisfjölmiðilsins EER að bandarískt herlið hafi verið með viðveru í Eistlandi frá því að ríkin gerðu tvíhliða samkomulag árið 2022. Herinn er ekki með fasta viðveru en skiptir reglulega út herafla í landinu.
Einungis 100 hermenn eftir
Hanno Pevkur, varnarmálaráðherra Eistlands, segir nýja sveit bandarísks herliðs væntanlega til landsins í sumar.
Sveitinni sé ætlað að dvelja þar út árið en óvíst sé hvað taki við eftir það. Hann segir fjölda hermanna í landinu hafa verið á bilinu 500 til 700 en nú séu færri en 100 eftir.
Pevkur segir það ekki ljóst hversu stór sveitin verður sem kemur í sumar. Það eigi eftir að skýrast þegar sex mánaða endurskoðun Pentagon liggi fyrir.
Hann segir jafnframt að ekki sé búist við neinum tíðindum um framtíð bandarísks herliðs á leiðtogafundi NATO sem hefst í Ankara í Tyrklandi í dag.
Eistland verði því að treysta á eigin varnir og fjölþjóðlegar orrustusveitir NATO sem skiptast reglulega á að vera í Eystrasaltsríkjunum.
Bíða eftir ákvörðun Bandaríkjamanna
Kalev Stoicescu, formaður varnarmálanefndar eistneska þingsins, segir ríki á austurvæng NATO hafa verið látin bíða eftir því að Bandaríkin taki ákvörðun um áframhaldandi viðveru herafla, óháð því hversu stórum hluta landsframleiðslu ríkin verja til varnarmála.
Hann segir að ef bandarískt herlið ætti að vera áfram staðsett einhvers staðar í Evrópu ætti það að vera á austurvængnum.
„Við getum sungið, dansað og jafnvel hoppað á öðrum fæti,“ er haft eftir formanninum í umfjöllun ERR.
„En á endanum eru það Hvíta húsið og bandarísk stjórnvöld sem taka ákvörðun út frá eigin hagsmunum og framtíðarsýn Bandaríkjanna.“
