Kæru ónefnds einstaklings til kærunefndar jafnréttismála vegna uppákomu sem varð við setningu Alþingis í september 2024 hefur verið vísað frá. Kærandinn vildi meina að hann hefði verið beittur mismunun af hálfu lögreglunnar á höfuðborgarsvæðinu þegar lögreglumenn hefðu krafist þess að hann myndi lækka í tónlist sem hann var að spila við Austurvöll meðan þingsetningin stóð yfir.
Kærandinn lagði kæruna fram sama dag og atvikið varð. Hann sagðist í kærunni hafa setið fyrir framan girðingu og spilað tónlist í mótmælum. Væntanlega var þar um að ræða öryggisgirðingu sem var uppi á meðan þingsetningu stóð.
Sagði kærandinn lögregluna hafa komið til sín og beðið hann að lækka í tónlistinni. Hann hefði spurt hvort hann væri að brjóta lög eða hvort um væri að ræða skipun en lögreglan hefði þá hótað honum með þjófnaði á hátalaranum hans.
Nefndin óskaði eftir frekari skýringu á kærunni og benti kærandanum á að hún tæki til meðferðar mál sem vörðuðu brot á lögum um jafnan rétt utan vinnumarkaðar. Engin svör bárust og í febrúar 2025 vísaði nefndin málinu frá á þeim grundvelli að í kærunni hefði skort upplýsingar um í hverju meint mismunun hefði falist.
Mismunun eður ei
Kærandinn svaraði nefndinni í mars 2025 og sagðist þurfa aðstoð vegna fatlana og geðraskana. Úrskurðurinn frá febrúar 2025 var þá afturkallaður og málið tekið fyrir að nýju. Í apríl 2025 var óskað eftir afstöðu kærandans. Hann svaraði í júlí 2025.
Í athugasemdum lögreglunnar á höfuðborgarsvæðinu vegna kærunnar kom fram að umræddan dag hafi setning Alþingis farið fram. Lögregla hafi verið með aukinn viðbúnað á svæðinu vegna fylgdar forseta Íslands og þingmanna. Ekki væri að finna í gögnum lögreglu samskipti við kærandann þennan dag. Af kærunni mætti álykta að kærandinn hafi verið staddur á Austurvelli umræddan dag þegar Alþingi var sett.
Hafi svo verið kunni hann að hafa verið beðinn um að lækka í háværri tónlist á þeim tíma. Samkvæmt 4. grein lögreglusamþykktar fyrir Reykjavíkurborg hafi lögreglustjóri heimild til þess að banna notkun hátalara, hljóðfæra eða annars þess háttar á eða við almannafæri ef ástæða sé til að ætla að hún valdi verulegu ónæði eða truflun.
Skýra
Í niðurstöðu kærunefndar jafnréttismála segir að enda þótt kærandinn telji framkomu lögreglu gagnvart sér hafa vera ámælisverða eða ólögmæta sé einungis við hans orð að styðjast um afskipti lögreglu umrætt sinn eða í hverju þau fólust. Lögreglan á höfuðborgarsvæðinu útiloki hins vegar ekki að ef kærandinn hafi verið að spila háværa tónlist á Austurvelli við þingsetningu kunni hann að hafa verið beðinn um að lækka hana, á grundvelli lögreglusamþykktar Reykjavíkur.
Nefndin segir að þótt að kærandinn hafi rakið í svari til nefndarinnar að hann eigi við fötlun og geðraskanir að stríða hafi hann ekki gert grein fyrir því hvernig hann telji að sér hafi verið mismunað á grundvelli þeirra þátta í umrætt sinn.
Nefndin segir að í ljósi þessa sé skilyrðum laga fyrir því að hún taki málið til meðferðar ekki fullnægt og því verði ekki hjá því komist að vísa málinu frá.
Nefndin tekur það sérstaklega fram í lokin að uppkvaðning úrskurðar í málinu hafi tafist umfram þann tveggja mánaða frest, sem hún hafi til að úrskurða í máli eftir að gagnaöflun í því sé lokið, samkvæmt lögum um stjórnsýslu jafnréttismála. Sé ástæða þess einkum mikill fjöldi mála sem sé til meðferðar hjá nefndinni auk breytinga á vistun nefndarinnar og starfsmannahaldi hennar. Í því samhengi má nefna að síðan árið 2024 hefur nefndin heyrt undir þrjú mismunandi ráðuneyti. Fyrst var hún flutt frá forsætisráðuneytinu til félagsmálaráðuneytisins og síðan þaðan til dómsmálaráðuneytisins.
