Nokkrir nemendur við Háskóla Íslands vinna nú að því að þróa vörur úr köngulóarsilki sem hægt væri að nota í stað nælonþráðs. Markmiðið er að skapa umhverfisvænt og niðurbrjótanlegt efni.
Teymið samanstendur af fimm meistaranemum og einum bakkalárnema í lífvísindum við Háskóla Íslands. Silkið verður unnið úr barkarkönguló Darwins sem Ingi Agnarsson prófessor í dýrafræðum uppgötvaði ásamt öðrum rannsakendum árið 2010. Hún framleiðir einn sterkasta köngulóarvef heims. Ekki stendur til að framleiða efnið beint úr köngulónni heldur ætlar hópurinn að notast við gersvepp sem nefnist pichia pastoris.
Hópurinn komst í 10 liða úrslit í Gullegginu og stefnir á að taka þátt í iGEM í nóvember sem er stærsta hönnunarlíffræðikeppni í heiminum. Þetta er í fyrsta skipti sem Ísland tekur þátt.
