Hildur Björnsdóttir oddviti Sjálfstæðisflokks í Reykjavík horfir til tveggja kosta til myndunar meirihluta í borgarstjórn. Annars vegar tveggja flokka meirihluti með Miðflokki, og hins vegar þriggja flokka samstarf með Viðreisn og Framsóknarflokknum.
Björg Magnúsdóttir oddviti Viðreisnar í Reykjavík segir í samtali við fréttastofu að Hildur hafi skýra valkosti.
„Við erum búin að verja miklum tíma saman, við oddvitarnir, síðasta sólarhringinn og það eru auðvitað einhver óformleg samtöl hingað og þangað. Það eru tveir mjög skýrir valkostir og augljóst að Hildur er með boltann. Hún fékk þannig niðurstöður upp úr kössunum þannig við tökum fagnandi þeim samtölum sem munu eiga sér stað í dag og næstu daga.“
Ingibjörg Sólrún Gísladóttir, fyrrverandi formaður Samfylkingarinnar, hefur beðið Guðmund Árna Stefánsson, flokksbróður sinn og oddvita framboðsins í Hafnarfirði, afsökunar á orðum sem hún lét falla á kosninganótt.
Samfylkingin missti helminginn af fylgi sínu í Hafnarfirði og fór úr fjórum bæjarfulltrúum í tvo.
Guðmundur Árni sagði sjálfur í viðtali við fréttastofu að hann þurfti að hugsa sinn gang. Ingibjörg tók undir það síðar á kosningavökunni og bætti við að hann hefði jafnvel átt að hugsa sinn gang fyrir kosningarnar.
Í Facebook-færslu fyrr í dag segir Ingibjörg:
„ Það var nú ekki sanngjarnt af mér að segja þetta og Guðmundur Árni á þetta ekki skilið. Hann hefur lagt mikið af mörkum til Samfylkingarinnar á undanförnum árum. Ég hef þegar beðið hann afsökunar á þessu.“
Framsóknarflokkurinn og Sjálfstæðisflokkurinn á Akranesi hafa náð samkomulagi um að hefja meirihlutaviðræður. Þetta staðfestir Líf Lárusdóttir, oddviti Sjálfstæðisflokksins.
„Við Ragnar, oddviti Framsóknar og frjálsra, höfum handsalað meirihlutaviðræður og þær eru hafnar í dag og halda áfram næstu daga,“ segir Líf. Ragnar Sæmundsson er oddviti Framsóknarflokksins og frjálsra á Akranesi.
Sjálfstæðisflokkurinn hlaut góða kosningu á Akranesi í gær eða 33,6% atkvæða og þrjá fulltrúa. Framsóknarflokkurinn fékk 23,6% og missir einn fulltrúa. Áður var Sjálfstæðisflokkurinn í meirihluta með Samfylkingunni sem hlaut í gær 22,3% atkvæða og tvo fulltrúa. Viðreisn og Miðflokkurinn fengu einn fulltrúa hvor.
„Fyrst og fremst er ég gríðarlega þakklát fyrir þennan stuðning,“ segir Líf Lárusdóttir sem segist hafa fundið fyrir miklum meðbyr í kosningabaráttunni.
Elliði Vignisson, bæjarstjóri í Ölfusi og oddviti Sjálfstæðisflokksins, er sigurreifur í færslu á Facebook.
Sjálfstæðisflokkurinn hlaut 70% atkvæða í sveitarstjórnarkosningunum í Ölfusi í gær, þrátt fyrir það sem Elliði segir hafa verið kosningabaráttu við þingflokk og ráðherra. Þar á hann við kosningabaráttu Samfylkingarinnar, sem ráðherrar og starfsmenn þingflokks tóku þátt í.
„Hvað þá forsætisráðherra sem gekk hér um og bankaði á dyr og lagði sjálfa sig undir. Það er ekkert að því. Hver er siðurinn í sínu landi,“ skrifar Elliði.
Hann segir frambjóðendur Samfylkingarinnar í Ölfusi hafa stigið ólíkt fram.
„Þau voru málefnaleg og trú sjálfu sér. Þau sýndu stórmennsku í að mæta til okkar og óska okkur til hamingju með stórsigurinn, þegar úrslit lágu fyrir. Ég hlakka til samstarfs við þau. Ég veit að þar fer gott fólk,“ skrifar Elliði.
Oddviti Sjálfstæðisflokksins í borginni segir báða kosti mögulegs meirihluta í borgarstjórn góða: þriggja hluta meirihluta með Viðreisn og Sjálfstæðisflokki, og tveggja flokka meirihluta með Miðflokknum.
Hilmar Gunnarsson, oddviti Sjálfstæðisflokksins í Mosfellsbæ, segist virkilega ánægður með niðurstöður kosninganna. „Þetta er bara frábær sigur fyrir okkur,“ segir hann.
Flokkurinn hlaut 42,2% atkvæða og 5 fulltrúa af 11 og er þannig í lykilstöðu til að mynda meirihluta.
Hilmar segir að flokkurinn vilji byrja á því að lækka álögur á íbúa,
„Að reyna að stíga aðeins á bremsuna varðandi fasteignaskatta hérna í Mosfellsbæ,“ segir hann. „En svo erum við búin að setja saman flotta málefnaskrá og stöndum hörð á henni þegar við förum að tala við fólk í dag og næstu daga,“ segir Hilmar.
Sjálfstæðisflokkurinn, Framsóknarflokkurinn og L-listinn hafa hafið formlegar meirihlutaviðræður á Akureyri. Þetta staðfestir Óðinn Svan Óðinsson, oddviti L-listans, við fréttastofu.
Framboðin fengu öll tvo fulltrúa í kosningunum og geta myndað sex manna meirihluta.
Valdimar Víðisson, bæjarstjóri Hafnarfjarðar og oddviti Framsóknarflokksins, segir niðurstöðu kosninganna stórkostlega.
„Við erum að fá rúm tvö þúsund fleiri atkvæði en við fengum í heild síðast og það eru skýr skilaboð til okkar frá bæjarbúum að þeir vilja hafa okkur áfram við stjórn bæjarins,“ sagði hann í kosningaútvarpi RÁSAR 2 en flokkurinn hlaut um 11% fleiri atkvæði en í síðustu kosningum, alls 24,3%.
Framsókn bætir við sig einum fulltrúa og er með þrjá líkt og Sjálfstæðisflokkurinn sem tapar einum.
Meirihlutinn heldur sem Valdimar túlkar sem traustsyfirlýsingu til flokksins og meirihlutans. Hann segir að viðræður um meirihlutasamstarf við Sjálfstæðisflokkinn hefjist strax í dag. Miðflokkurinn kemur inn sem nýr flokkur og telur Valdimar að landslag borgarstjórnarinnar verði ívið breiðara að þessu sinni.
Kristján Þór Kristjánsson, oddviti Framsóknarflokksins á Ísafirði, segir að meirihlutaviðræður hefjist strax í dag. Hann á þó ekki vona á því að þær klárist fyrr en síðar í vikunni.
„Við ætlum nú bara að hittast og ræða málin eftir þetta viðtal,“ segir hann. Áhersla hafi verið lögð á að mynda samstöðu innan sveitarfélagsins. Við teljum það heillavænlegt að ná ákveðinni samstöðu,“ sagði hann í kosningaútvarpi RÁSAR 2 þar sem Pétur Magnússon og Hulda Geirsdóttir fóru yfir helstu niðurstöður kosninganna í gær.
Ísafjarðarlistinn sem var í hreinum meirihluta bauð ekki fram að þessu sinni og varð Framsóknarflokkurinn stærstur að þessu sinni með fjóra fulltrúa og 34,3% atkvæða. Alls eru 9 fulltrúar í Ísafjarðarbæ og flokkurinn því einum fulltrúa frá hreinum meirihluta.
Kristján Þór segir það merkilegt að Ísafjarðarlistinn hafi ekki farið fram en listinn hafi verið blanda Samfylkingar, Vinstri grænna og Viðreisnar ásamt óháðum.
„Þetta held ég að hafi verið í fyrsta skipti frá upphafi Ísafjarðarbæjar árið 1996 sem fimm flokkar voru að berjast um þetta,“ segir hann.
„Við erum gríðarlega stolt af þessum árangri, þetta er gríðarleg bæting,“ sagði Vilhjálmur Árnason, þingmaður Sjálfstæðisflokksins og oddviti flokksins í Reykjanesbæ, í kosningaútvarpi Rásar 2.
Flokkurinn er í lykilstöðu og er í raun ekki hægt að mynda meirihluta án hans. Vilhjálmur segist opinn fyrir samvinnu með flestum flokkum og gerir tilkall til bæjarstjórastólsins.
Sjálfstæðisflokkurinn bætti við sig tveimur fulltrúum í kosningunum og er alls með fimm fulltrúa. Alls eru 11 fulltrúar í Reykjanesbæ og flokkurinn þannig nálægt hreinum meirihluta.
Næstur á eftir Sjálfstæðisflokknum er Framsóknarflokkurinn með þrjá fulltrúa.
„Þetta er bara það sem við fundum í kosningabaráttunni, að fólk var að kalla eftir breytingum og tók vel í okkar málflutning,“ segir Vilhjálmur.
Hann segir að helst hafi verið kallað eftir breytingum í skipulagsmálum, þá hvernig húsnæðisuppbygging til framtíðar er hugsuð og atvinnustefnu bæjarins.
„Að atvinnulífinu yrði tekið opnari örmum og þörfum þess mætt hraðar svo það öfluga atvinnulíf sem er hér á staðnum fái betri jarðveg til að vaxa og dafna,“ segir hann.
Þá hafi einnig íþróttamál, velferðarmál og útlit bæjarins verið mikið til umræðu.
Niðurstöður kosninganna á Akureyri voru virkilega áhugaverðar. Alls fengu fjórir flokkar tvo fulltrúa: Sjálfstæðisflokkurinn, L-listinn, Samfylkingin og Framsókn.
Þrír flokkar fengu svo einn fulltrúa en það eru Miðflokkurinn, Vinstri græn og Akureyrarlistinn. Mjótt var á munum milli L-listans og Sjálfstæðisflokksions eða alls um 16 atkvæði.
Við blasir flókin staða þar sem ekki er ljóst hvert meirihlutasamstarfið verður.
„En það eru líka margir möguleikar sem gerir þetta spennandi,“ segir Óðinn sem tekur fram að núverandi meirihluti sé þó fallinn.
Flestir flokkar hafi tekið daginn snemma og óformlegar viðræður séu hafnar.
„En engir fundir byrjaðir,“ segir Óðinn sem segist ekki ætla að gera tilkall til bæjarstjórastólsins miðað við niðurstöður kosninganna.
„Nei, alls ekki, ég held að það verði fyrst að sjá hverjir ná saman og skoða málefnin en svo kemur eftir á hverjir ætla að sitja í hvaða stóli,“ segir hann.
Talningu í Langanesbyggð lauk klukkan 7:30 í morgun en þar fóru fram óbundnar kosningar.
454 voru á kjörskrá í sveitarfélaginu og kosningaþátttaka mældist 57,9%. Eftirfarandi einstaklingar hlutu kosningu í sveitarstjórn:
Mateusz Swierczewski
Jóhann Hafbrg Jónasson
Júlíus Þröstur Sigurbjartsson
Christina Elisabeth Merkel
Ólína Ingibjörg Jóhannesdóttir
Sigurður Ragnar Kristinsson
Sigurður Þór Guðmundsson
Varamenn þeirra eru:
Dagur Indriðason
Björn Sigurður Lárusson
Vikar Már Vífilsson
Hanna Margrét Úlfsdóttir
Silvia Jónsdóttir
Jódís Ósk Jónsdóttir
Jóhann Bjarni Einarsson
16 nýir fulltrúar taka sæti í borgarstjórn eftir kosningarnar. Sjö þeirra koma af lista Sjálfstæðisflokksins og þrír frá Miðflokki.
Kannanir Gallup og Maskínu fyrir kosningar reyndust ansi nálægt þeim niðurstöðum sem urðu. Hægri flokkar bættu við sig en ívið minna reyndist í kjörkössum fyrir vinstri flokka en spáð hafði verið fyrir.
Sjálfstæðisflokkurinn stendur uppi sem ótvíræður sigurvegari kosninganna í Reykjavík með 32,5% atkvæða og fær níu borgarstjórnarfulltrúa. Flokkurinn mældist ívið undir því í seinustu könnunum og hefði fengið átta fulltrúa ef mælingar í könnunum hefðu reynst niðurstöður kosninganna.
Kjörsókn á landsvísu var 66,8% sem er nokkru meira en í sveitarstjórnarkosningunum 2022 þegar 62,2% kusu.
Í Reykjavík jókst kjörsókn úr 61,1% í 66,3%.
Í stærri sveitarfélögum var kjörsókn áberandi verst í Reykjanesbæ, 51,6%, sem er þó nokkur aukning frá 2022 þegar 47,4% kusu.
Óhætt að segja að Sjálfstæðisflokkurinn annars vegar og Miðflokkurinn hins vegar geti best unað við niðurstöður kosinganna.
Sjálfstæðisflokkurinn fékk níu fulltrúa kjörna í Reykjavík og er með alla valdaþræði í hendi sér og getur myndað meirihluta með Miðflokknum sem fékk þrjá fulltrúa. Þá eru Sjálfstæðismenn með hreinan meirihluta í Kópavogi, Garðabæ, og Seltjarnarnesi og eru auk þess sem flokkurinn er stærstur í Hafnarfirði, Reykjanesbæ, Akureyri og Múlaþingi.
Samfylkingin galt afhroð í Reykjavík og Hafnarfirði.
Þegar litið er á afdrif flokkanna á landsvísu getur þó reynst þrautin þyngri að telja nákvæmlega saman fulltrúa flokka og framboða um landið, en hér má sjá stutta samantekt.
Góðan daginn og velkomin á þessa fréttavakt!
Eftir spennandi og viðburðaríka kosninganótt munum við fara nánar yfir úrslitin og fylgjast með fyrstu þreifingum til myndunar meirihluta í sveitarstjórnum landsins.
Hér má lesa fréttavakt næturinnar þar sem úrslitin voru tekin fyrir í beinni útsendingu.
