Páll Vilhjálmsson skrifar:

Embætti héraðssaksóknara, áður sérstaks saksóknara, stundaði saksókn í samvinnu við fjölmiðla allt frá stofnun árið 2009. Embættið var sett á laggirnar vegna hrunsins, ætlað að rannsaka og eftir atvikum saksækja efnahags- og fjármálaafbrot.

Starfsaðferðir embættisins mótuðust í andrúmslofti eftirhrunsins. Almenningur krafðist að hrunkvöðlar yrðu dregnir fyrir dóm. Til að friðþægja almenning hóf embættið samstarf við fjölmiðla og lak upplýsingum um yfirvofandi handtökur, framgang rannsóknar og framburð sakborninga. Tilfallandi ræddi samstarfið fyrir rúmu ári:

Allt frá stofnun embættis sérstaks saksóknara er náið samspil milli embættisins og fjölmiðla, einkum RÚV. Síðustu daga hafa verið tíunduð dæmi um sviðssetningar. Embættið lét RÚV vita hvenær sakborningar yrðu leiddir fyrir dómara. Við það fékkst myndefni af sakamönnum í fréttatíma RÚV. Tilfallandi nefndi dæmi í gær um beinlínusamband milli embættisins og Inga Freys Vilhjálmssonar blaðamanns, þá á DV, síðar Stundin/Heimildin og nú á RÚV. Einar Sveinsson, sem er vitni en ekki sakborningur, mætir í skýrslutöku 22. febrúar 2010, og það er komin frétt tveim dögum síðar til að gera hann tortryggilegan. Finnur Þór Vilhjálmsson, saksóknari hjá sérstökum/héraðssaksóknara, fór fyrir 12 ára rannsókn Sjólaskipa. Ingi Freyr bróðir hans skrifaði sakfellandi fréttir. Málarekstri var hætt, enda engar sakir. Ingi Freyr skrifaði ekki síðustu fréttina, um að Sjólamálið hafi verið fellt niður. Dæmin eru fleiri af samkrulli ákæruvalds og dagskrárvalds fjölmiðla. Markmiðið var og er pólitískt, að hafa áhrif á samfélagið með ákærum og sakfellandi fréttum.

Embætti sérstaks saksóknara/héraðssaksóknara hélt áfram að leka upplýsingum til fjölmiðla þótt hrunmálum fækkaði jafnt og þétt. Samstarfið saksóknara og fjölmiðla varð æ nánara. Í Namibíumálinu, sem hófst í nóvember 2019, bjó RÚV málið í hendur embættis héraðssaksóknara með Kveiks-þætti. Í Namibíumálinu er embætti héraðssaksóknara ekki lengur sjálfstæð stofnun heldur hluti af dagskrárvaldi RÚV.

Líkt og nærri má geta valdefldist RÚV við að hafa embætti héraðssaksóknara í vasanum. Næsta stóraðgerð RÚV, á eftir Namibíumálinu, var byrlunar- og símamálið er hófst vorið 2021. Er RÚV reyndi að fela slóðina, aðkomu að byrlun, stuldi og afritun, fékk Þóra Arnórsdóttir ritstjóri Kveiks á RÚV, þaulvanan tölvumann til liðs við sig. Í sms-skilaboðum til andlega veikar eiginkonu Páls skipstjóra Steingrímssonar, sem sá um að byrla og stela fyrir blaðamenn, skrifar Þóra 24. ágúst 2021 að hún sé með á sínum snærum tölvumann. Þó nokkur sms-skilaboð fóru fram á milli Þóru og konunnar þennan ágústdag. Meðal annars textar Þóra: ,,Ok. Ég athuga m héraðssaksóknara." Ritstjóri Kveiks er með innherjatengsl hjá embættinu. Þóra biður andlega veiku konuna að láta af hendi einkasíma sinn til að eyða gögnum. Tölvumaðurinn muni sjá um það og sá maður er dularfullur. Þóra skrifar:

Hann vill helst ekki hittast (mjög varkár maður, skiljanlega) en spyr hvort þú treystir honum fyrir símanum einn dag?

Heiðar Þór Guðnason er tölvusérfræðingur hjá embætti héraðssaksóknara og hefur verið það frá því að embættið hét sérstakur saksóknari. Heiðar er núna sakborningur í lekamáli kennt við PPP. Nútíminn fjallar um margháttuð aukaverk Heiðars fyrir hina og þessa aðila sem ekki eru réttvísinni að góðu kunnir. Nútíminn hefur ítrekað beðið um upplýsingar er varða störf Heiðars Þórs hjá embætti héraðssaksóknara og aukavinnuna í ljósi stöðu hans sem sakbornings í lögreglurannsókn á leka frá embættinu. Ólafur Þór héraðssaksóknari svarar ekki erfiðum spurningum frá fjölmiðlum. RÚV spyr engra spurninga um hvort eðlilegt sé að sakborningur undir lögreglurannsókn starfi hjá saksóknara við að framfylgja lögum.

RÚV og embætti héraðssaksóknara eru í sama liðinu. Til skamms tíma var þetta lið á sigurbraut. RÚV skáldaði glæpi og sigaði saksóknara á saklausa; RÚV stundaði glæpi og fékk skjól hjá saksóknara.