Sólveig Anna Jónsdóttir, formaður Eflingar, er gagnrýnin á breytingar á launakjörum formanns VR og telur þau samrýmast illa lögum Alþýðusambands Íslands (ASÍ).
„Það er verið að stilla málunum upp þannig að það sé þarna verið að niðurgreiða laun formanns VR með því að láta launin sem hún þiggur sem einn varaforseta Alþýðusambandsins ganga inn í launakostnaðinn sem annars væri allur á VR vegna formennskunnar,“ segir hún.
Framkvæmdastjóri VR segir þetta ekki niðurgreiðslu
Laun Höllu Gunnarsdóttur, formanns VR, voru nýlega hækkuð. Samhliða því samþykkti stjórn verkalýðsfélagsins að taki formaður að sér önnur launuð störf komi þau til frádráttar eða renni til VR, til dæmis laun sem formaður þiggur fyrir störf sín sem varaforseti ASÍ.
Stefán Sveinbjörnsson, framkvæmdastjóri VR, segir breytinguna til þess gerða að auka gagnsæi. Laun formanns séu ein ákveðin tala og ef hún sinni öðrum embættum á vinnutíma breytist þau ekki.
„Það er bara útfærsluatriði hjá okkur. Það stenst auðvitað alveg lög Alþýðusambandsins að þetta verði greitt til formanns eins og verið hefur.“
Engin breyting er á launakostnaði ASÍ. „Ég get ekki séð að það sé verið að breyta einhverju hjá ASÍ, að þetta verði einhver niðurgreiðsla þar frekar en verið hefur,“ segir Stefán.
Sólveig Anna segir hins vegar ekki hægt að beintengja formennsku VR við varaformennsku ASÍ og launagreiðslur starfanna.
„Það gengur ekki að skattar aðildarfélaganna fari án nokkurrar umræðu og nokkurs samþykkis í það að niðurgreiða laun formanns eins aðildarfélags.“
Hún segir ekkert í lögum ASÍ opna á fyrirkomulagið sem VR hefur samþykkt. Sjálf hafi hún aldrei heyrt um fyrirkomulag sem þetta.
Með lægri laun en forverinn
Launahækkun Höllu nam um tæpum 200 þúsund krónum. Sólveig Anna hefur einnig gagnrýnt þá breytingu.
Hún sagði í Bítinu á Bylgjunni í gærmorgun að hækkunin rýrði traust félagsmanna til formannsins og að það skyti skökku við að laun Höllu hækkuðu á sama tíma og langtímakjarasamningar væru í hættu á að falla úr gildi.
Í því samhengi er þess þó vert að geta að Halla er með lægri laun en Ragnar Þór Ingólfsson, félags- og húsnæðismálaráðherra og forveri hennar í starfi, var með sem formaður VR.
Mánaðarlaun Höllu nema nú rétt rúmum 1,9 milljónum. Samkvæmt minnisblaði til stjórnar VR vegna breytinga á launum formanns kom fram að launakjör Ragnars Þórs væru að núvirði rétt rúmlega 2,1 milljón.
