Blíðskaparveður var á Akureyri á þriðjudaginn og hiti fór í 18 stig. Vindur var hægur og Norðlendingar nutu góða veðursins. Mörgum leist þó ekki sem best á flugu sem var úti um allt. Hún sást víða á sveimi og virtist sérstaklega sækjast í að setjast á gula eða ljósa hluti.
Á Facebook-síðum bæjarins var spáð í hvort mý væri komið á kreik því lúsmý hefur gert sig heimakomið í bænum undanfarin ár.
Vængjaðar blaðlýs
Nú hefur fengist staðfest að þetta voru blaðlýs. Erlingur Ólafsson skordýrafræðingur segir að ákveðnar tegundir blaðlúsa fái vængi á haustin. Tilgangurinn með því er að lúsin geti dreift sér sem víðast. „Það hafa verið einhver skilyrði, einhver almenn skilyrði eða veðurskilyrði, sem hafa valdið því að svona mikið af blaðlúsum hafi farið á kreik,“ segir Erlingur.
Þær eru mjög fjölhæfar og jafnvel aðdáunarverðar fyrir það
Blaðlýs fjölga sér yfirleitt kynlaust og við kjöraðstæðuar með meyfæðingum.
Á plöntuvefnum Plantan.is segir:
„Þær eru mjög fjölhæfar og jafnvel aðdáunarverðar fyrir það. Við kjöraðstæður fjölga þær sér með meyfæðingu eða án frjóvgunar og eru því allar kvenkyns. Ein lús getur átt nokkur afkvæmi á dag og því fjölga þær sér mjög hratt við réttar aðstæður. Lýsnar eru venjulega vænglausar en þegar fer að þrengja að þeim fæðast vængjaðar lýs og þær geta flogið á milli plantna. Þegar fer að kólna í veðri fara að fæðast karldýr sem makast við kvendýrin sem verpa þá eggjum sem þola veturinn.“
