Kína og Bandaríkin hafa samþykkt að koma á fót samskiptavettvangi fyrir atvik sem upp koma tengd gervigreind. Hvíta húsið greindi frá þessu í gær.
Forsetar landanna, Donald Trump og Xi Jinping, komust að samkomulagi um þetta þegar Xi kom í nýafstaðinni opinberri heimsókn hans til Bandaríkjanna. Trump hefur gert lítið úr áhyggjum þeirra sem segja að gervigreindin ógni mannkyninu, en Xi var yfirvegaðri í afstöðu sinni og sagði að þróa þyrfti tæknina undir stjórn manna.
Samskiptavettvangurinn verður tvíhliða samskiptaleið til að ræða atvik sem koma upp. Fyrirkomulagið á samskiptavettvanginum og verklag þessu tengt var þó ekki útskýrt nánar í tilkynningu Hvíta hússins.
Samningur um kol og hagstæðari tolla
Þá greindi Hvíta húsið einnig frá því að Kína hefði samþykkt innflutning á að minnsta kosti tíu milljónum tonna af kolum frá Bandaríkjunum árin 2027 og 2028. Forsetarnir komust einnig að tvíhliða samkomulagi um hagstæðari tolla á vörum sem ekki teljast hættulegar. Kínversk stjórnvöld ætla auk þess að gefa Bandaríkjamönnum tvo pandabirni.
Yfirvöld í Kína hafa ekki sent frá sér tilkynningu eftir að Hvíta húsið gaf út sína.
