Vörpuðu þriggja tonna sprengju á ó­breytta borgara - Vísir

Árásirnar voru gerðar í bænum Komyshuvakha í Sapórisjía þann 2. nóvember. Degi áður höfðu ráðamenn í bænum lýst því yfir á samfélagsmiðlum að íbúar, sem voru enn nokkur hundruð, gætu komið í skólann til að fá brauð og aðrar nauðsynjar á milli tíu og hádegis.

Þetta munu íbúar hafa gert reglulega, þar sem bærinn er eingöngu í um tuttugu kílómetra fjarlægð frá víglínunni. Í skólanum fengu þau oft nauðsynjar og annars konar aðstoð, auk þess sem þau komu þar saman til að spjalla og leita sér skjóls vegna sprengjuregns.

Blaðamenn CNN hafa fengið aðgang að upptökum úr vestismyndavélum viðbragðsaðila í bænum og einnig myndir af sprengjubrotum og öðru sem varpar ljósi á hvurslags sprengjur Rússar notuðu.

Skömmu fyrir klukkan tíu lentu tvær sprengjur á skólalóðinni, samkvæmt yfirvöldum í Úkraínu. Um tuttugu mínútum síðar voru viðbragðsaðilar mættir á vettvang og þá höfðu margir leitað í neðanjarðarskýli á lóðinni.

Á upptökum þeirra má samkvæmt CNN sjá miklar skemmdir á byggingum á skólalóðinni og brak víða. Viðbragðsaðilar voru að reyna að bjarga konu sem sat föst undir steypuplötu.

Nokkrum mínútum síðar berast skilaboð um að von sé á fleiri sprengjum. Íbúum og viðbragðsaðilum var sagt að leita sér skjóls en margir fóru ofan í áðurnefnt byrgi.

Klukkan 10:35 sýndu upptökur úr vestismyndavélum tveggja lögregluþjóna mikla sprengingu í byrginu, sem hrundi ofan á fólkið sem hafði leitað sér þar skjóls.

Myndband úr vestismyndavél lögreglumanns má sjá í spilaranum hér að neðan.

Að minnsta kosti sex sprengjur féllu svo í kjölfarið.

Myndefni sem tekið var eftir árásina sýnir stærðarinnar gíg og hefur hann verið staðsettur á milli beggja innganga í byrgið sem fólkið flúði í.

Eins og áður segir dóu rúmlega fimmtíu í árásunum og þar á meðal fjórir lögregluþjónar og tveir björgunarsveitarmenn.

Á ensku eru árásir sem þessar kallaðar „Double-Tap“ árásir og eru þær iðulega gerðar af hryðjuverkamönnum víðs vegar um heiminn og er þeim ætlað að valda miklu mannfalli meðal viðbragðsaðila sem bregðast við fyrstu árásinni. Rússar voru á árum áður ítrekað sakaðir um árásir sem þessar í Sýrlandi en þeir hafa einnig gert fjölmargar í Úkraínu.

Báru kennsl á sprengjuna

Úkraínumenn hafa tilgreint hvaða sprengju Rússar notuðu til að granda byrginu og fella fólkið þar inni. Hún er sögð vera af gerðinni FAB-3000 en það er sérstök svifsprengja sem er hönnuð til að granda neðanjarðarbyrgjum

Svifsprengjur eru oft stórar gamlar sprengjur sem Rússar hafa sett vængi og staðsetningarbúnað á. Þeim er varpað hátt úr lofti og geta svifið tugi kílómetra áður en þær lenda á skotmörkum sínum.

FAB-3000 er tæplega þrjú tonn að þyngd.

CNN ræddi við sérfræðinga sem skoðuðu myndefni frá bænum og myndir af sprengjubrotum og braki úr vængjum sprengjunnar, sem staðfestu að um FAB-3000 væri að ræða.

Danielle Bell, yfirmaður starfshóps Mannréttindaskrifstofu Sameinuðu þjóðanna í Úkraínu, hefur fordæmt árásina. Degi eftir að árásin var gerð sagði hún að um skýrt brot á mannréttindalögum væri að ræða.

„Annaðhvort vissu rússneskir hermenn að þarna átti mannúðarverkefni að eiga sér stað, eða þeir tóku ekki það grunnskref að kanna hvað væri um að vera í bænum sem þeir ætluðu sér að ráðast á. Hvort sem það er, þá virðist þessi árás hafa brotið gegn grundvallargildum alþjóðlegra mannréttindalaga.“

Hér að neðan má sjá myndband frá í sumar þegar FAB-3000 var varpað á annan bæ í Sapórisjía.