Þórdís Lóa Þórhallsdóttir hefur verið ráðin framkvæmdastjóri Félagsbústaða hf. Ráðning Þórdísar Lóu byggir á mati ráðgefandi hæfnisnefndar, að því er segir í tilkynningu. Niðurstaða nefndarinnar hafi verið að Þórdís Lóa væri með afgerandi hætti talin best uppfylla hæfniskröfur starfsauglýsingar.
Hún hefur störf 10. ágúst. Félagsbústaðir reka og leigja út um 3.200 íbúðir í Reykjavík. Fráfarandi framkvæmdastjóri Félagsbústaða er Sigrún Árnadóttir.
Þórdís Lóa var oddviti Viðreisnar í borgarstjórn síðastliðin átta ár og gaf kost á sér sem sveitarstjóraefni L-lista framfara í Þingeyjarsveit í sveitarstjórnarkosningum í vor. L-listinn fékk 29,2% atkvæða og tvo fulltrúa kjörna. Á-listi Ábyrgðar fékk fjóra fulltrúa kjörna, 49,1% atkvæða, og hreinan meirihluta.
„Þórdís Lóa býr yfir víðtækri og fjölþættri reynslu af stjórnun, stefnumótun og rekstri bæði innan opinberrar stjórnsýslu og atvinnulífs. Hún hefur frá árinu 2018 gegnt lykilhlutverkum hjá Reykjavíkurborg, m.a. sem formaður borgarráðs og forseti borgarstjórnar,“ segir í tilkynningu Félagsbústaða.
Býr yfir umfangsmikilli reynslu
Þórdís Lóa sat í borgarstjórn frá 2018-2026 og var einnig forseti borgarstjórnar þegar Samfylkingin, Framsókn, Viðreisn og Píratar voru í meirihluta frá 2022-2025.
„Þórdís Lóa hefur jafnframt umfangsmikla reynslu af velferðar- og félagsmálum, árin 1997–2005 starfaði hún sem yfirmaður öldrunarþjónustu Reykjavíkurborgar og framkvæmdastjóri þjónustusviðs á velferðarsviði Reykjavíkurborgar (Félagsþjónustunni í Reykjavík). Að auki hefur hún starfað sem forstjóri og stjórnandi í atvinnulífinu og gegnt stjórnarformennsku og setið í stjórnum fjölmargra félaga,“ segir í fréttatilkynningu.
Þá er Þórdís Lóa með MBA-gráðu í rekstrarhagræði og framhaldsnám í félagsráðgjöf.
„Í bókun stjórnar Félagsbústaða kemur fram að menntun hennar, reynsla og leiðtogahæfni falli vel að starfsemi félagsins og því mikilvæga hlutverki sem það gegnir í húsnæðismálum Reykjavíkur.“
