Eyjólfur Ármannsson innviðaráðherra telur Ísland ekki eiga erindi í Evrópusambandið en segir að Flokkur fólksins muni vinna af heilum hug að því að fá besta samning mögulegan ef þjóðin velur að hefja á ný aðildarviðræður í þjóðaratkvæðagreiðslunni í haust.
„Ég tel óþarfi að vera að sækja um í samtök sem ég tel að við eigum ekki heima í,“ sagði Eyjólfur í Kastljósi. „Ég er mjög mikill stuðningsmaður EES-samningsins, okkur hefur gengið vel innan EES. Ég tel að það sé samningur sem við eigum að halda í og gæta hagsmuna okkar í.“
Eyjólfur kaus með þjóðaratkvæðagreiðslunni á Alþingi og segir mikilvægt að þjóðin fái að taka þessa ákvörðun.
„Mikilvægt að þetta snúist ekki um ríkisstjórnarsamstarfið“
Þrátt fyrir afstöðu hans og Flokks fólksins um hvort Ísland eigi erindi í ESB segir Eyjólfur að flokkurinn sé reiðubúinn að sitja við samningaborðið með hinum ríkisstjórnarflokkunum ef meirihluti landsmanna velur að ganga til viðræðna að nýju.
„Alveg tvímælalaust, það er mjög mikilvægt að þetta snúist ekki um ríkisstjórnarsamstarfið, þessi atkvæðagreiðsla,“ sagði Eyjólfur.
„Við erum að senda spurningu til þjóðarinnar. Þjóðin þarf að segja af eða á, já eða nei. Svo getum við haldið áfram. Það er mjög mikilvægt að við getum sent svona spurningar til þjóðarinnar um svona mikilvæg mál svo hún fái að segja sitt.“
Þannig að þið mynduð vinna að því af heilum hug ef niðurstaðan verður já?
„Við munum vinna að því að fá besta samninginn sem hægt er, það er grundvallaratriði og mjög mikilvægt.“
