Vöktun verður efld og myndavélum komið fyrir til að fylgjast með mannaferðum í Klaustrið í Garðabæ. Slysahætta er í húsinu, sem hefur staðið autt í um fimm ár, og á annað tug tilkynninga hafa borist um húsbrot þar á þessu ári.
Fyrrum nunnuklaustur Sankti-Jósefssystra hefur staðið autt í árabil. Líkt og greint var frá í fréttum í gær hafa ungmenni og ógæfufólk vanið komur sínar þangað.
Flestar tilkynningar frá áhyggjufullum nágrönnum
Skúli Jónsson, aðstoðaryfirlögregluþjónn í Hafnarfirði, segir flestar tilkynningar um að verið sé að fara inn í húsið koma frá áhyggjufullum nágrönnum.
„Fyrst voru þetta rúðubrot og svo hefur fólk verið farið þarna inn, hurðir brotnar og speglar brotnir og svona ýmislegt, skrúfað frá vatni og svona,“ segir Skúli.
„Við höfum verið í sambandi við sveitarfélagið varðandi þessar tilkynningar til okkar sem hefur reynt eftir sínu fremsta megni að byrgja þessar brotnu rúður og reynt allt til að koma í veg fyrir að þarna sé farið inn. En einhverra hluta vegna ná menn að spenna upp hlera sem er búið að negla fyrir.“
Íbúar í nágrenninu hafa lýst yfir áhyggjum af öryggi ungmenna sem leika sér í og við húsið. Djúpur brunnur er fyrir utan húsið sem stendur stundum opinn. Starfsfólk Garðabæjar lokar honum reglulega en auðvelt er að taka hlerann af.
Innandyra liggja glerbrot á víð og dreif og erfitt væri að komast út ef eldur skyldi kvikna í húsinu, þar sem byrgt er fyrir glugga og hurðir. Slökkviliðið hyggst taka út öryggi í húsinu á næstu dögum.
Erfitt að tryggja flóttaleiðir
Aldís Rún Lárusdóttir varaslökkviliðsstjóri segir klaustrið síðast hafa verið skoðað árið 2018.
„Í grunninn er áherslan á að fólk komist ekki inn því það er erfitt að tryggja flóttaleiðir í húsi sem er ekki í notkun. Svo þarf að skoða bara aðrar brunavarnir, meta hvort þörf sé á lágmarksbrunaviðvörun eða öðrum ráðstöfunum.“
Nú er rafmagn á húsinu, getur skapast eldhætta af því?
„Við eigum eftir að skoða þetta en já, það auðvitað getur skapast ákveðin hætta af því ef rafmagn er illa frágengið. Þannig að það verður bara hluti af okkar skoðun,“ segir Aldís.
Almar Guðmundsson, bæjarstjóri í Garðabæ, segir að myndavélakerfi verði komið upp og vöktun við húsið efld. Bæjaryfirvöld hafi þegar fundað með íbúum í grennd við Klaustrið.
Hann segir húsið hafa verið illa farið vegna myglu en vilji sé til að koma því í notkun að nýju þrátt fyrir miklar skemmdir sem verði kostnaðarsamt. Húsið eigi sér sterka sögulega skírskotun í Garðabæ og vilji sé fyrir því að hefja það aftur til vegs og virðingar.
