Uppbygging varnargarða á Reykjanesskaga var ríkislögreglustjóra ofviða. Ríkisendurskoðun gagnrýnir óskýra verkaskiptingu, skort á eftirliti með kostnaði og hvernig ákvarðanir voru teknar. Varaformaður stjórnskipunar- og eftirlitsnefndar Alþingis segir að skýra þurfi skipulag og viðbragð við náttúruhamförum.
Úttekt Ríkisendurskoðunar var kynnt á fundi nefndarinnar í morgun. Í henni segir að embætti ríkislögreglustjóra hafi ekki haft nauðsynlega þekkingu eða burði til að fara með jafn umfangsmiklar og flóknar verklegar framkvæmdir og uppbyggingu varnargarða á Reykjanesskaga.
Setjum fólk í aðstæður sem þau ráða ekki við
Jón Gnarr, varaformaður stjórnskipunar- og eftirlitsnefndar, segir að skýra þurfi hver beri ábyrgð í aðgerðum sem þessum.
„Þetta er náttúrlega ákveðið reiðarslag, þessi skýrsla, og það er alveg ljóst að umgjörð og undirbúningur fyrir svona náttúruhamfarir eru bara ekki nógu vel útfærð, það er hvernig eigi.“
Íslendingar hafi sýnt fádæma þrautseigju og úrræðasemi í tengslum við eldvirkni, bæði þegar gaus í Vestmannaeyjum og á Reykjanesskaga. Engu að síður þurfi að taka skipulag og samskipti ráðuneyta til gagngerrar skoðunar.
„Enn og aftur erum við að setja fólk og aðila í einhverjar aðstæður sem þau eru síðan ekki í stakk búin til að ráða við.“
