Veðrið lék við íbúa höfuðborgarsvæðisins síðdegis í gær en þegar fór að kvölda tók himininn á sig hvítgulan lit og yfir lagðist dulúðlegt mistur. Einar Sveinbjörnsson veðurfræðingur segir í færslu á vefsíðu sinni Bliku að líklegast sé um reykjarmistur frá skógareldum í Kanada að ræða.
Vindáttin var suðvestlæg og loftið barst því af hafi. „Útiloka má saltmóðu, en hún er haust- og vetrarfyrirbæri samfara stormum á Grænlandshafi,“ bendir Einar á. „Reykjarmistur frá skógareldunum í Kanada er haldbærasta skýringin. Enda sýna bakreikningar loftagna með Hysplit í 500 og 1.500 m hæð yfir Reykjanesskaga í kvöld uppruna þeirra vestan frá víðáttum Kanada, þaðan sem það barst um fyrir 5-10 dögum.“
Gæti gerst oftar samfara hlýnun jarðar
Þá benda loftgæðamælingar á suðvesturhorninu ekki til þess að mistrið hafi stafað af ryk- eða sandfoki að mati Einars, því þá myndu mælingar sýna aukið magn af grófu svifryki. Margir mælar hafi aftur á móti numið aukið magn fíns svifryks.
„Kannski verður meira um mistur þessarar ættar hér á landi í framtíðinni samfara hlýnun jarðar,“ segir Einar, þar sem hlýrri sumur valda auknum skógareldum í Norður-Ameríku.
Hundruð skógarelda hafa logað í Kanada á síðustu dögum og vikum. Þúsundir hafa þurft að yfirgefa heimili sín í landinu vegna eldanna. Í það minnsta 28 þúsund ferkílómetrar lands hafa brunnið, það er vel yfir fjórðungur af flatarmáli Íslands.
